LIGJET E BIZNESIT
Valixhet e mëdha e të mbushura plotë, të paktën në dukje tregojnë se Khared dhe Hasan, dy të rinj nga Izraeli kanë në planë të qëndrojnë ca ditë në Shqipëri.
“Do rrimë për 6 ditë. Kemi marrë një apartament këtu në Tiranë. E kemi prenotuar në Airbnb. Mendojmë të eksplorojmë fillimisht Tiranën e pastaj do të lëvizim edhe në jug”, tregon Khared, turist nga Izraeli.
Arsyet se pse kanë zgjedhur një apartament me qira ditore në vend të një hoteli na i tregon Hasani.
“Po si fillim çmimi. Kemi paguar vetëm 35 dollarë për ditë. Pra rreth 200 dollarë për gjithë kohën që do rrimë. E dyta është pozicioni gjeografik. Nuk është se mund të gjesh shumë hotele në Booking afër qendrës”, shprehet Hasani, turist nga Izraeli.
Çmimet e lira dhe alternativat e shumta, përherë e më tepër po joshin të huajt që jo vetëm të vizitojnë vendin, por edhe të qëndrojnë për disa ditë. Të dhënat nga Instituti i Statistikave tregojnë se në prill fjetën në një nga hotelet, bujtinat apo apartamentet me qira të vendit gati 130 mijë të huaj. Kjo shifër është gati 2-fish më e lartë se në po të njëjtin muaj të një viti më parë.
Megjithatë, marrë në total numrin e tyre që hynë në vend në prill, vetëm 16.3 për qind e tyre u akomoduan.
Kjo shifër është në rritje me muajt paraardhës, megjithatë ende larg deklarimeve reale vlerësojnë aktorë nga tregu i akomodimeve.
“Kjo tregon informalitetin. Shqipëria ka gati 48 për qind të kapaciteteve akomoduese apartamente dhe vila jashtë sistemit tatimor. Kjo dëmton sa arkën e shtetit, aq edhe konkurrencës mes subjekteve”, shprehet Zak Topuzi, kryetar i shoqatës së Hoteleri-Turizmit.
Të dhënat nga Instituti i Statistikave tregojnë ndërkohë se pjesa më e madhe e turistëve të huaj në prill, gati 70 mijë u akomoduan në hotelet dhe apartamentet me qira kryesisht në Tiranë e Durrës. Në Vlorë, Himarë dhe Sarandë qëndruan rreth 24 mijë, ndërsa pjesa tjetër u akomoduan në bujtinat e veriut të vendit.
