LIGJET E BIZNESIT
Ky vit po rezulton i mbarë për linjat ajrore globale. Ato rritën parashikimin e tyre të fitimit për 2024-ën përballë numrit rekord të pasagjerëve. Shoqata Ndërkombëtare e Transportit Ajror njoftoi se këtë vit, pritet që industria në mbarë botën të gjenerojë 30.5 miliardë dollarë fitim, me rritje gati 3 miliardë kundrejt një viti më parë.
Një normë e tillë e lartë e fitimit vjen vetëm katër vje,t pasi industria u shemb në një humbje prej 140 miliardë dollarësh në vitin 2020 si rezultat i pandemisë.
Ndërkohë rendimenti i pasagjerëve ose thënë ndryshe, shuma mesatare e paguar nga një pasagjer për të fluturuar një milje pritet të rritet me 3.2% krahasuar me vitin 2023. Kjo për shkak edhe se rritja e kapacitetit është e kufizuar, duke ushtruar presion në rritjen e çmimeve mesatare. Në të kundërt, cmimet për ngarkesat pritet të ulen me 17.5% këtë vit, pasi transporti i mallrave po kthehet në normalitet, pas situatës me pandeminë.
Ecuria pozitive e aktivitetit të linjave ajrore shihet gjerësisht si një provë për ringjalljen e besimit të biznesit dhe konsumatorit, e reflekuar edhe tek një performancë më e mirë e sektorit të tregtisë.
