Blemë më shumë duhan, birra e kafe, shqiptarët e të huajt i japin hov importit të “mallrave të ndaluar”

Nga cigaret te karburantet, bashkë me birrën e kafen…. shqiptarët e të huajt e ardhur për turizëm po shtojnë importet e “produkteve të dëmshme” për shëndetin e mjedisin. Të dhënat nga Drejtoria e Përgjithshme e Doganave tregojnë se në pesë muajt e parë të vitit u importuan gati 248 mijë tonë karburant. Në raport me të njëjtën periudhë kohore të një viti më parë importet e lëndës djegëse janë zgjeruar me 8.2 për qind. Rrjedhimisht kërkesa e lartë do të thotë çmime të shtrenjta.

“Po duhet. E kemi të nevojshme. Po këto çmimet janë tmerr. Edhe në këtë periudhë ato vetëm rriten”, thonë qytetarët.

Me gjithë shtrenjtimin, në vend po importohet duhan si kurrë më parë. Të dhënat nga “Doganat” tregojnë se importet e cigareve në harkun e muajve janar-maj arritën në 1 mijë 148 tonë, 4.3 për qind më tepër se një vit më parë.

“Janë shtuar shumë të rinjtë që blejnë duhan. Ka edhe turistë. Ka edhe nga ata që blejnë cigare të hapura”, shprehet një shitës në kioskë.

Me ritme të ngjashme me cigaret janë rritur edhe importet e kafes. Të dhënat nga Drejtoria e Përgjithshme e Doganave tregojnë se në harkun e muajve janar-maj u ble nga jashtë një sasi prej 3 mijë e 517 tonë kafe, 3.8 për qind më tepër se një vit më parë.

Për shkak të akcizës mbi prodhimin vendas, në vend këtë vit është futur më tepër birrë. Importet e pijes alkoolike në pesë muajt e parë të vitit arritën në mbi 3 mijë e 500 tonë duke u zgjeruar me 3.8 për qind në raport me një vit më parë.

Të dhënat nga Ministria e Financave tregojnë se si pasojë e akcizës mbi këto produkte, në pesë muajt e parë të vitit buxheti i shtetit arkëtoi 23.1 miliardë lekë, 2 miliardë lek ose 9.4 për qind më shumë se një vit më parë./A2 CNN