Falsifikimi i kartëmonedhave, ja prerjet më të shpeshta në qarkullim

Kartëmonedhat e prerjeve 1000 lekë dhe 5000 lekë janë ato që falsifikohen më shumë. Banka e Shqipërisë ka dhënë detaje lidhur me procesin e falsifikimit të kartëmonedhave dhe monedha metalike, si dhe mbrojtjes nga kjo dukuri gjatë vitit 2023.

“Banka e Shqipërisë ka të drejtën ekskluzive të nxjerrjes dhe të qarkullimit të monedhës kombëtare “Lek”. Ajo përcakton format, peshat, masat, modelin dhe karakteristikat e tjera të kartëmonedhave dhe monedhave metalike shqiptare, me kurs ligjor brenda vendit.

Gjatë vitit 2023 janë sekuestruar 195 kartëmonedha kombëtare të falsifikuara në qarkullim, si dhe 71 monedha metalike. Koeficienti i kartëmonedhave të falsifikuara për 1 milion copë kartëmonedha në qarkullim është ulur në vitin 2023, kur ky tregues ka arritur nivelin e 1.3 copë kartëmonedha për 1 milionë në qarkullim, kundrejt 2.2 në vitin 2022”, thekson institucioni mbikëqyrës bankar.

Kartëmonedhat më të falsifikuara janë ato të prerjeve 1000 Lekë dhe 5000 Lekë, të ndjekura nga prerjet 2000 Lekë dhe 500 Lekë. Sa i përket monedhave, ajo e prerjes 50 Lek vijon të jetë e vetmja e falsifikuar, megjithëse në sasi të ulët dhe të papërfillshme. Numri më i madh i kartëmonedhave false i takon serisë së vjetër, me 153 copë. Ky fakt dëshmon cilësinë e lartë dhe elementet e sigurisë të aplikuara në kartëmonedhat e serisë së re.

Nga këndvështrimi teknik, kartëmonedhat e falsifikuara janë riprodhime të thjeshta me pajisje digjitale komerciale, pothuajse vetëm me teknikën ink-jet me ngjyra, të shoqëruara me aplikim të teknikave artizanale dhe teknologjike për imitimin e elementeve të sigurisë. Në asnjë rast nuk ndeshen imitime të elementeve të sigurisë të lexueshme prej pajisjeve autentifikuese.