E-Banking/ Shqiptarët preferojnë transaksionet bankare nëpërmjet telefonit, pesha arrin në 58% të totalit

Shqiptarët po shkojnë më pak në banka dhe veprimet po i kryejnë nëpërmjet aplikacioneve online. Të dhënat e fundit të Bankës së Shqipërisë tregojnë se në tremujorin e parë të këtij viti, numri i transaksioneve në distancë arriti në pak më shumë se 2 milionë, në rritje me 19% krahasuar me të njëjtën periudhë të një viti më parë.

Rritja është pak më e lartë në vlerën e veprimeve të kryera, që arriti në 528.4 miliardë lekë, pothuajse 21% më shumë krahasuar me të njëjtën periudhë të vitit të kaluar.

Aktualisht, bankat tregtare në Shqipëri i ofrojnë të gjitha ofrojnë shërbimet e bankingut në distancë, çka nënkupton se çdo klient i sektorit bankar ka në dispozicion një kanal alternativ për kryerjen e pagesave. Të dhënat zyrtare tregojnë se në tremujorin e parë të këtij, transfertat nga kanalet digjitale përbënin 58% të numrit total të transfertave bankare,  nga 57% që ishin vitin e kaluar.