Një amnisti tjetër fiskale me normë tatimore 3% për rivlerësimin e pronave mund të aplikohet në Shqipëri. Kjo në bazë të propozimit të depozituar tashmë në Kuvend nga deputetja socialiste Blerina Gjylameti. Nisma synon t’u ofrojë qytetarëve mundësinë e rivlerësimit të pasurive të paluajtshme deri me 31 qershor të vitit 2025. Përfitues do të jenë edhe individët që janë në proces legalizimi dhe regjistrimi të pasurisë si dhe individët që disponojnë kontratë sipërmarrje.
“Miratimi i këtij projektligji do të ketë efekte të drejtpërdrejta në nxitjen dhe formalizmin me vlerën e tregut të pasurive të paluajtshme. Nisur edhe nga përvoja ndër vite, rivlerësimi i pasurisë së paluajtshme ka përbërë një ndër aktet ligjore më me interes për qytetarët, duke sjellë një rritje të konsiderueshme të këtyre rivlerësimeve, shoqëruar edhe me regjistrime të shumë transaksioneve pranë Agjencisë Shtetërore të Kadastrës. Prandaj, propozimi i këtij projektligji ka për qëllim t’u ofrojë edhe një herë qytetarëve mundësinë e rivleresimit të pasurive të paluajtshme deri më 31 qershor 2025”, theksohet në relacionin që shoqëron projektligjin.
Për agjentët në tregun e pasurive të patundshme, kjo amnisti do të kishte efekte pozitive në treg, pasi do të nxiste transaksionet dhe do të zhbllokonte ato pasuri të “ngrira”, për shkak ta tatimit që aplikohet aktualisht në masën 15 për qind të diferencës midis çmimit të blerjes dhe atij të shitjes.
Amnistia e fundit në rivlerësimin e pasurive të patundshme ka qenë ajo e vitit 2020, sërish me norma tatimore 3%.
