Yield-i obligacioneve 10-vjeçare pësoi rënie në ankandin e kësaj jave, duke reflektuar pjesëmarrjen e lartë të investitorëve dhe rënien e pritshmërive rreth inflacionit.
Sipas informacionit nga Banka e Shqipërisë, yield-i uniform i pranuar i obligacioneve në ankandin e sotëm të rihapjes zbriti në 6.36%, nga 6.78% që kishte qenë në emetimin fillestar të këtyre instrumenteve, në muajin janar.
Nga 3 miliardë lekë që kishte qenë shuma e shpallur për financim nga Ministria e Financave, vlera totale e kërkesave në ankand arriti në pothuajse 8 miliardë lekë.
Ministria e Financave vendosi të rrisë shumën e pranuar me maksimumin e 15%, në shumën 3.45 miliardë lekë. Rritja e shumës së pranuar ka ndikuar edhe në rritjen e yield-it uniform të pranuar.
Në ankandet e obligacioneve, yield-i përcaktohet si uniform me yield-in e kërkesës më të lartë të pranuar. Në këtë mënyrë, pranimi i më shumë kërkesave konkurruese ndikon edhe në rritjen e yield-it të obligacionit.
Ankandet e obligacioneve më afatgjata, siç janë ato me maturim 10-vjeçar apo 15-vjeçar, janë një alternativë e mirë për investitorët që synojnë të rrisin kthimet e portofolit të tyre.
Këtu përfshihen investitorët institucionalë, si fondet e investimit dhe sidomos ato të pensioneve, por këto instrumente mund të jenë një alternativë joshëse edhe për investitorët e vegjël.
Të dhënat e tremujorit të parë të këtij viti kanë treguar një rënie të ndjeshme të inflacionit. Në muajin mars, inflacioni zbriti në 2.3%, niveli më i ulët në pothuajse tre vjet. Kjo rënie e inflacionit ndikon ndjeshëm edhe pritshmëritë për normat e interesit.
Deri në fund të vitit të kaluar, skenari bazë mbështetur në orientimet e Bankës së Shqipërisë dukej se ishte një rritje e mëtejshme e normës bazë të interesit për vitin 2024.
Por, me rënien e inflacionit këto pritshmëri janë zbehur ndjeshëm. Norma bazë e interesit qëndron në nivelin 3.25% që prej nëntorit të vitit të kaluar.
Me normën aktuale të inflacionit, të shoqëruar edhe me një rikthim të mbiçmimit të lekut në kursin e këmbimit, edhe pritshmëritë e investitorëve për normat e interesit duket se po zhvendosen në ulje.
Megjithatë, Banka e Shqipërisë edhe në daljet e fundit ka vazhduar të japë mesazhe të kujdesshme, duke theksuar se presionet e brendshme inflacioniste ngelen të larta, siç ka dëshmuar sidomos rritja e peshës së shërbimeve në inflacionin total./Monitor
