Thellohet kriza e eksporteve, rënia 22.3% si tremujor. Më keq fasonët

Eksportet shqiptare po marrin goditje të njëpasnjëshme. Zhvlerësimi i euros dhe rritja e kostove të lëndëve të para po “godasin” industrinë, që nuk e ka nisur mbarë këtë vit.

Sipas të dhënave të Institutit të Statistikave, në mars eksportet e mallrave arritën vlerën 33 miliardë lekëve, duke u ulur me 21.0 %, në krahasim me të njëjtën periudhë të një viti më parë. Ndërsa si tremujor, eksportet e mallrave arritën vlerën 95 miliardë lekë, duke u tkurrur me 22.3 %.

Gjatë muajit Mars 2024, në uljen e eksporteve prej -21.0 %, negativisht kanë ndikuar grupet: “Tekstile dhe këpucë” me -7.2 %, “Minerale, lëndë djegëse, energji elektrike” me -5.8 %, Materiale ndërtimi dhe metale” me -4.6 %.

Gjeografia e tregtisë së jashtme

Në muajin Mars 2024, vendet me të cilat Shqipëria ka pasur rritje më të madhe të eksporteve, në krahasim me Mars 2023 janë: Maqedonia e Veriut (8,5 %), Mbreteria e Bashkuar (39,7 %). Ndërsa vendet me të cilat eksportet kanë pasur uljen më të madhe, janë: Italia (10,9 %), Kosova (15.1 %) dhe Greqia (22.6 %).

Ndërsa si periudhë tremujore, vendet me të cilat eksportet kanë pasur uljen më të madhe, janë: Italia (11,7 %), Kosova (7,3 %) dhe Greqia (37,5 %). Në muajin Mars 2024, vendet me të cilët Shqipëria ka pasur rritjen më të madhe te importeve, janë: Turqia (7,1 %), Kina (0,9 %) dhe Gjermania (7,2 %). Ndërsa vendet me të cilat importet kanë pasur uljen më të madhe, janë: Italia (1,5 %), SHBA (26,6 %) dhe Maqedonia e Veriut (27,5 %).

Gjatë këtij tremujori, vendet me të cilët Shqipëria ka pasur rritje më të madhe të importeve, në krahasim me një vit më parë, janë: Turqia (21,6 %), Greqia (25,8 %) dhe Gjermania (10,5 %). Ndërsa vendet me të cilat importet kanë pasur uljen më të madhe janë: Italia (3,1 %), Kina (10,0 %) dhe Spanja (5,2 %).