LIGJET E BIZNESIT
Eksperti i turizmit Auron Tare është shprehur lidhur me modelin e zhvillimit të turizmit në Shqipëri dhe për ndërtimet masive që po bëhen në jug të vendit. Ai analizon se po humbet një nga vlerat thelbësore, që është autenticiteti. “Zhdukja e arkitekturës tradicionale, pejsazheve historike dhe zëvendësimi i tyre me grumbuj betoni të shëmtuar është një gabimet e mëdha që po lejohet të ndodhë. Aq më keq promovimi i tyre”, thekson Tare në një njoftim në facebook, duke e ilustruar qëndrimin e tij edhe me foto.
Postimi i plotë:
Zhvillime të tilla në Jugun e Shqipërisë po krijojnë një model të dëmshëm për të ardhmen e turizmit, duke fshirë një nga vlerat thelbësore të markës vendase. Autenticitetin.
Zhdukja e arkitekturës tradicionale, pejsazheve historike dhe zëvendësimi i tyre me grumbuj betoni të shëmtuar është një gabimet e mëdha që po lejohet të ndodhë. Aq më keq promovimi i tyre.
Por a ka vlerë argumenti vetëm në vlerat estetike? Trendi i turizmit botëror ka vite tashmë që po shkon drejt vlerave lokale si garantuesi i qëndrueshmërisë së industrisë. Nëse Shqipëria do të vazhdojë të promovojë dhe mbështesë zhvillime të tilla si fotot në fjalë, shumë shpejt do të humbasë atraksionin e saj, duke u kthyer në një destinacion pa vlera lokale. Ndërkohë humbësit e mëdhenj do të jenë banorët dhe bizneset e vogla, ndërsa fituesit e mëdhenj do të jetojnë në Vjenë apo Paris, pasi t’iu kenë shitur vilat e betonit zengjinëve të rinj shqiptarë.
