Kujdesi për fëmijët dhe shtëpinë/ Studimi i Un Women: Puna e papaguar e grave në Shqipëri, 324 milionë euro në vit

Përllogaritet më shumë se 5 orë në ditë puna që një grua në Shqipëri shpenzon në kujdesin për shtëpinë, fëmijët dhe familjen. Një punë e papaguar dhe një kontribut që është ndjeshëm më i lartë sesa ai i burrave. Ky është një ndër përfundimet e studimit “Hartimi i argumentit për investimin në kujdesin universal pa pagesë për fëmijët në Shqipëri”, realizuar nga UN Women. Studimi bën një analizë të kostove të kujdesit për fëmijët, efekteve mbi të ardhurat fiskale dhe cënueshmërisë shumëdimensionale me në qendër gjininë.

Sipas studimit, puna e papaguar përbën rreth 60% të PBB-së në Shqipëri . Vlera e kësaj pune është 84 dollarë (71 euro) bazuar në pagën mesatare mujore prej 390 dollarë (330 euro). Kur merret në konsideratë se 35% e rreth 1,08 milion grave në Shqipëri janë të punësuara, ekonomia shqiptare po humb një potencial prej 32 milionë dollarë (27 milion euro) çdo muaj. Kjo përkthehet në një shumë prej 385 milionë dollarë (324 milion euro) në vit.

Gratë në Shqipëri kanë sot një akses shumë më të ulët sesa burrat në tregun e punës. Sipas të dhënave të Institutit të Statistikave, pjesëmarrja e grave në punësim është 66.7% kundrejt 80% që është tek burrat. Ky nivel mbetet i ulët, pavarësisht një rritje progresive të shënuar vitet e fundit.