LIGJET E BIZNESIT
Pas gjetjeve të Kontrollit të Lartë të Shtetit me asistencën e UN Women për integrimin e grave të zonave rurale në tregun e punës dhe biznes, qeveria ka reflektuar. Në Strategjinë për Zhvillimin e Agrobiznesit, që është hedhur për konsultim publik fokusi vihet tek gratë dhe të rinjtë. Gratë shihen si një potencial i madh për zhvillimin e agroturizmit dhe kryesisht bizneseve në këtë sektor të rëndësishëm, të lidhur ngushtë me bujqësinë dhe turizmin.
“Fuqizimi i grave luan një rol strategjik në zhvillimin e agroturizmit, “turizmin e eksperiencës” dhe në zinxhirin e shkurtër të furnizimit. Duke marrë parasysh përbërjen familjare në ferma dhe llojin më të përhapur të bujqësisë tradicionale në territorin shqiptar, gratë konsiderohen si “thesare” të vërteta të njohurive për përpunimin e produkteve dhe përdorimet tradicionale të prodhimit vendas”, theksohet në Strategjinë e Agroturizmit.
Në këtë dokument vihet theksi tek barazia gjinore, nëpërmjet zbatimit të lehtësive, duke sjellë edhe përvojat ndërkombëtare.
“Përvojat e huaja tregojnë edhe një prirje të madhe të popullsisë femërore për aktivitete edukative dhe sociale, të cilat kjo strategji synon t’i zbatojë në zhvillimin shumëfunksional të fermave. Për këtë arsye, agroturizmi mund të jetë një instrument për të promovuar të drejta dhe mundësi të barabarta për gratë, duke krijuar sipërmarrje dinamike, unike, të orientuara drejt zinxhirit të furnizimit , të cilat kanë një vlerë të lartë për zhvillimin social të komuniteteve dhe fshatrave. Gratë dhe të rinjtë duhet të jenë objekt synimi përmes masave specifike të financimit për të minimizuar vështirësitë e këtyre grupeve për të aksesuar kreditë bankare dhe për të nxitur zhvillimin ndërbreznor”, theksohet në Strategji.
Masat që propozohen për gratë:
Startegjia për zhvillimin e agroturizmit parashikon disa masa për të nxitur pjesëmarrjen e grave në tregun e punës dhe hapjen e bizneseve në këtë degë të ekonomisë. Ndër masat kryesore janë promovimi i heqjes së taksave për blerjen e tokave; promovimi i garancive shtetërore të pjesshme për huatë lidhur me investimet nga gratë për agroturizmin social dhe edukativ; realizimi i një studimi për sistemin e punësimit të grave në fushën e bujqësisë dhe për ndikimin e politikave që synojnë fleksibilitet më të lartë të tregut të punës lidhur me bujqësinë, përmes modeleve sezonale të punësimit për të rinjtë dhe gratë, në kombinim me politikat e tatimit dhe kontributet e sigurimit shoqëror.
Gjithashtu, parashikohet promovimi i rregulloreve të sigurisë në punë përmes stimujve për trajnimin dhe blerjen e pajisjeve të mbrojtjes personale për ata që punësojnë gratë.
Strategjia parashikon edhe objektiva të qarta përsa i përket aktivizimit të grave. Kështu, pritet që numri i grave biznesmene të arrijë në 45% brenda vitit 2025 dhe 55% brenda vitit 2027. Ndërkohë që numri i grave të punësuara në sektorin e agroturizmit të arrijë në 60% brenda vitit 2025 dhe 65% brenda vitit 2027.
Strategjia e Agroturizmit me fokus gratë vjen pas rekomandimeve të qarta që janë bërë për integrimin e tyre në tregun e punës dhe sipërmarje nga KLSH dhe Un Women. Kjo pasi gratë janë një potencial shumë i madh, me përfitime për ekonomitë familjare dhe ekonominë e përbashkët.
