Raporti për paratë e pista/ Ja sa euro u futën nga Britania e Madhe dhe Dubai

Llogaritet në rreth 666 milionë euro shuma e përfituar vitin e kaluar nga aktivitet e paligjshme jashtë vendit dhe që është futur në Shqipëri. Shifra është publikuar në një raport të Iniciativës Globale kundër Krimit të Organizuar dhe rezulton të jetë sa 3 për qind e Prodhimit të Brendshëm Bruto. Pjesa më e madhe e këtyre parave, gati 480 milionë euro hynë nga vende si Britania e Madhe apo Dubai, ndërsa 186.5 milionë u gjeneruan nga aktiviteti kriminal në vend.

Sipas raporti, për shkak të flukseve financiare të paligjshme, Shqipëria humbet mesatarisht çdo vit 904 milionë dollarë në tregtinë globale. Kjo shifër është sa rreth 6 për qind e gjithë Prodhimit të brendshëm Bruto vjetor të vendit.

Flukset e paligjshme të parave vlerësohen nga ekspertët si arsyeja kryesore e deformimeve në kursin e këmbimit. Vitin e kaluar, euro u zhvlerësua me mbi 15 për qind dhe një ndër arsyet ishte oferta monetare shumë e lartë në këtë monedhë.

Të dhënat nga Banka e Shqipërisë tregojnë se në fund të vitit të shkuar, sasia e parave që qarkullon jashtë bankave në vend arriti në 393.6 miliardë lekë apo rreth 3.8 miliardë euro.

Sipas ekspertëve, sasia kaq e madhe e parave jashtë bankave lidhet pikërisht me flukset financiare të paligjshme që hyjnë nga jashtë apo prodhohen brenda vendit.

🎙️ Podcast “Money Hour” | Fast News Economy