Nën sulmin e hakerave, INSTAT njofton shtyrjen e publikimit të të dhënave zyrtare

Publikimi i të dhënave zyrtare do të shtyhet, pas sulmit të hakerave iranianë që ka pësuar tashmë prej disa ditësh Instituti i Statistikave. Ka qenë ky institucion që ka bërë këtë njoftim për të gjithë publikun.

INSTAT publikon çdo muaj të dhënat në lidhje me sektorët e industrisë, tregtisë, bujqësisë, ndërtimit, të dhëna demografike e sociale etj. Por sulmi kibernetik ka bërë që shërbimet e internetit të faqes zyrtare dhe e-mailit të jenë ndërprerë.

Si pasojë janë dëmtuar një sërë sistemesh brenda INSTAT, por jo të dhënat e Censit, sipas vetë njoftimeve që ka bërë ky institucion.

Njoftimi i plotë i INSTAT

(INSTAT) njofton publikun se për shkak të një sulmi kibernetik që preku disa nga sistemet e tij më 31 janar 2024 do të shtyjë publikimin e statistikave zyrtare deri në një njoftim të dytë. Sulmi kibernetik i cili synoi të dëmtojë të dhënat e INSTAT ka bërë që shërbimet e internetit të faqes zyrtare dhe emailit të jenë ndërprerë. INSTAT siguron publikun se të dhënat e Censit 2023 nuk janë objekt i këtij sulmi. Ekipi teknik i INSTAT menjëherë aktivizoi protokollet e emergjencës për të mbrojtur të dhënat dhe parandaluar dëmtime të mëtejshme.

INSTAT do të vazhdojë aktivitetin e tij statistikor dhe do të përdorë mjete alternative komunikimi si adresa e email-it [email protected] dhe kanalet zyrtare të rrjeteve sociale, Instagram dhe Facebook.

INSTAT i kërkon ndjesë publikut për këtë pamundësi ofrimi shërbimesh momental që shkaktoi ky incident dhe siguron publikun se po punon intensivisht për të rikthyer shërbimet e tij sa më shpejt të jetë e mundur. INSTAT do të njoftojë datat e reja të publikimit dhe falënderon përdoruesit, partnerët dhe veçanërisht ekspertët e Autoritetit Kombëtar për Certifikimin Elektronik dhe Sigurinë Kibernetike (AKCESK) për ndihmën dhe mbështetjen e tyre të vazhdueshme gjatë kësaj periudhe deri në funksionimin e plotë të gjithë sistemeve të Teknologjisë së Informacionit të INSTAT.

INSTAT mbetet i angazhuar për të siguruar statistika zyrtare me cilësi të lartë dhe të besueshme për përdoruesit.