Greqia “rrëmben” turistët nga Turqia, ja lehtësia që ofron

Një leje qëndrimi 7 ditore që jepet menjëherë. Deri në këtë moment vizitorët që vinin nga Turqia për në Greqi duhej të dorëzonin dokumentet në konsullatën greke të Izmirit dhe të prisnin miratimin.

Por tashmë turistët që vijnë nga Turqia mund të vizitojnë dhjetë ishuj grekë me një vizë të shpejtë të përkohshme. Viza e cila zgjat shtatë ditë, do të jepet brenda ditës së kërkesës, dhe ishujt që do të mund të vizitohen janë shumë pranë bregut turk, dhe që prej vitesh tërheqin vizitorë nga Turqia pavarësisht marrëdhënieve të vështira diplomatike mes Athinës dhe Ankarasë.

Tashmë shtetasit turq mund të përfitojnë nga kjo procedurë e shpejtë dhe sipas autoriteteve greke janë me mijëra personat që kanë shfaqur interes. Por vendimi është pritur shumë mirë dhe nga banorët e ishujve grekë.

Ata shprehen se me turqit mund të bashkëpunojnë shumë mirë në sektorin e turizmit dhe të kulturës. Janë të shumtë turqit që vizitojnë ishujt grekë, sidomos me jahte. Të gjithë presin që numri i turistëve nga Turqia të shumëfishohet brenda një kohe të shkurtër falë kësaj procedure.

Dhe duke qëndruar në hotele apo duke bërë blerje, banorët e zonave do të përfitojnë më shumë të ardhura. Madje mendohet se ata mund të mbushin boshllëkun e krijuar nga turistët izraelitë për shkak të luftës aktuale në Rripin e Gazës. Banorët e ishujve mbështesin fuqishëm vendimin e ri duke shpresuar në më shumë turistë nga Turqia që këtë verë.