LIGJET E BIZNESIT
U promovua në Universitetin Mesdhetar të Shqipërisë, libri “Diplomacia Ekonomike” e studiuesit Emilio Çika, njëkohësisht dhe Zv. Dekan i Fakultetit të Drejtësisë dhe Shkencave Humane në UMSH. Libri u vlerësua nga Presidenti i Universitetit Mesdhetar të Shqipërisë, Anastas Angjeli, Rektori, Adrian Civici, Drejtori i Shkollës Doktorale Arben Cici, Pro rektori, Përparim Kabo si dhe kolegë pedagogë.
“Monografia Diplomacia Ekonomike e studiuesit Emilio Çika është një kontribut i rëndësishëm, që i vjen në ndihmë studiuesve të shkencave politike, ekonomisë, marrëdhënieve ndërkombëtare, studimeve evropiane dhe periferike por edhe një lexuesi të familjarizuar me çështjet e politikës ndërkombëtare”, tha Presidenti i UMSH në fjalën e tij. Libri u vlerësua si një një përpjekje e rëndësishme për të futur në shinat e debatit kritik komponentin ekonomik të diplomacisë bashkëkohore.
Vetë autori shprehu falenderimet e tij më të sinqerta, ndaj drejtuesve të Universitetit Mesdhetar edhe familjes. Autori në pjesën e parë të monografisë fokusohet në debatet teorike të marrëdhënieve ndërkombëtare, në qasje shpesh herë kundërshtuese me qëllim ndërtimin e bazamentit konceptual mbi të cilin qëndron pjesa empirike e studimit.
Duke shpjeguar në mënyrë analitike rolin, mjetet, rëndësinë, limitet e diplomacisë ekonomike në një sistem ndërkombëtar të globalizuar por gjithmonë në gjendje anarkie autori, nëpërmjet përdorimit të një gjuhe skrupolozisht teorike dhe të elaboruar por aspak të ngurtë dhe skematike, paraqet një tablo të qartë të tezave të tij dhe të qëndrimeve të tij teorike.
Duke mos u limituar në një përshkrim mekanik të kontributeve të deritanishme shkencore për diplomacinë ekonomike por duke mbajtur një qëndrim të thellë kritik autori e bën të qartë pozicionin e tij teorik për lexuesin. Pjesa teorike e monografisë përmbyllet me një analizë të gjendjes aktuale të diplomacisë ekonomike në Shqipëri dhe sfidave dhe mundësive për të ardhmen.
