LIGJET E BIZNESIT
Bizneset dhe konsumatorët kanë ulur besimin tek ekonomia, duke sinjalizuar një nisje jo të mbarë të 2024-ës. Sipas vrojtimit të publikuar nga Banka e Shqipërisë, Treguesi i ndjesisë ekonomike ra me 1.8 pikë në janar. Kjo rënia këtë muaj u ndikua kryesisht nga rënia e besimit në sektorin e ndërtimit dhe të shërbimeve. Në një masë më të vogël ndikoi edhe rënia e besimit konsumator. Nga ana tjetër, besimi në sektorët e industrisë dhe të tregtisë shënuan rritje në muajin janar.
Treguesi i besimit të industrisë (TBI) u rrit me 4 pikë përqindje në muajin janar. Niveli i TBI-së qëndron aktualisht 9 pikë përqindje mbi mesataren historike. Bizneset e industrisë u shprehën më optimiste lidhur me kontratat porositëse nga eksportet dhe gjendjen e prodhimit industrial aktual. Pritjet e bizneseve të industrisë për prodhimin dhe punësimin në të ardhmen regjistruan një rritje të lehtë. Pritjet për çmimet e produkteve që do të prodhojnë në të ardhmen janë vlerësuar me rënie këtë muaj.
Treguesi i besimit në ndërtim (TBN) ra me 8.6 pikë përqindje në janar. Megjithatë, niveli i tij vijon të qëndrojë ndjeshëm mbi mesataren historike, me rreth 18 pikë. Rënia e TBN-së u përcaktua kryesisht nga vlerësimet në rënie për aktivitetin aktual ndërtues. Vlerësimi për nivelin e porosive regjistroi rënie, por në masë më të ulët. Gjithashtu, pritjet për punësimin dhe çmimet që do të vendosin në të ardhmen kanë regjistruar rënie.
Treguesi i besimit në shërbime (TBSH) ra me 5.2 pikë përqindje në janar. Niveli i treguesit aktualisht qëndron 8.1 pikë përqindje mbi mesataren historike. Në rënien e TBSH-së kontribuuan vlerësimet më pak optimiste të bizneseve si për ecurinë aktuale të aktivitetit të tyre, si edhe për nivelin aktual të kërkesës. Gjithashtu, pritjet për kërkesën, nivelin e punësimit dhe ecurinë e çmimeve në të ardhmen vlerësohen në rënie nga këto biznese.
Treguesi i besimit në tregti (TBT) u rrit me 4.9 pikë përqindje në muajin janar. Aktualisht, niveli i TBT-së qëndron rreth 12 pikë përqindje mbi mesataren historike. Në rritjen mujore të TBT-së ndikoi kryesisht vlerësimi më optimist i bizneseve për ecurinë aktuale të biznesit të tyre. Pritjet për punësimin në të ardhmen regjistruan gjithashtu rritje të lehtë. Pritjet për çmimet në të ardhmen u vlerësuan me rënie.
Treguesi i besimit konsumator (TBK) regjistroi një rënie të lehtë me 0.9 pikë përqindje në muajin janar, duke zbritur afër nivelit të mesatares historike. Konsumatorët vlerësuan me rënie situatën e tyre financiare dhe situatën ekonomike të vendit në të ardhmen. Nga ana tjetër, vlerësimi i tyre për blerjet në shuma të mëdha u rrit lehtë në muajin janar.
