Banka e Shqipërisë mban të pandryshuar në 3.25% normën bazë të interesit për lekun. Është ky vendimi që ka marrë Këshilli Mbikëqyrës i BSH-së, pasi ka analizuar ecurinë e ekonomisë në këtë fillim viti. Guvernatori Gent Sejko shpjegoi këtë vendim, teksa nuk përjashtoi rritjen e mëtejshme të interesave në muajt në vijim, me argumentin se rreziku i inflacionit është ende i pranishëm.
“Këshilli Mbikëqyrës vëren se qëndrimi aktual i politikës monetare është konsistent me pritjet tona në skenarin bazë. Megjithatë vala e krizës së çmimeve ende nuk është tërhequr. Këshilli thekson se mbetet i gatshëm të vijojë procesin e normalizimit të qëndrimit të politikës monetare nëse kjo masë do të konsiderohet e nevojshme për kontrollin dhe stabilizimin e çmimeve”, u shpreh Sejko.
Kreu i Bankës së Shqipërisë vlerësoi se ekonomia do të vijojë rritjen, e mbështetur kryesisht nga konsumi dhe investimet private. Megjithëse ritmet e rritjes do të jenë më të ngadalta se ato të dy viteve të fundit.
“Ekonomia shqiptare do të vijë në rritje e nxitur nga zgjerimi i mëtejshëm i konsumit, investimeve dhe eksportit të shërbimeve. Rritja ekonomike do të ushqehet nga bilancet likuide të bizneseve dhe familjeve shqiptare si dhe kreditimi”, u shpreh guvernatori.
Banka e Shqipërisë vlerëson gjithashtu, se inflacioni po vijon të qëndrojë në nivele të larta, kryesisht për shkak të çmimeve të larta të karburanteve dhe qirave.
