Nga Aurora Sulçe, drejtuese e Fast News Economy
Këtë të premten ka mbyllur punimet 5 ditore Forumi Ekonomik Botëror, që zhvillohet në Davos. Këtë vit Shqipëria mungoi, ndryshe nga Kosova dhe Serbia, që e shfrytëzuan forumin për t’u paraqitur si aktorë paqedashës në rajon.
Po çfarë u diskutua këtë vit në forumin e Davos?
Tema kryesore ishte rindërtimi i besimit, në kuadër edhe të luftërave dhe tensioneve globale. Por jo vetëm. Rindërtimi i besimit duhet parë në një prizëm të gjerë dhe jo vetëm i lidhur me sigurinë. Në ekonomi, paraja është besim. Nëse ti nuk ke besim, nuk konsumon dhe as nuk investon. Ekonomia nuk ecën dhe gjithçka rrezikon.
Në funksion të këtij qëllimi, pjesëmarrësit në Davos u fokusuan tek siguria dhe bashkëpunimi; ulja e normave të interesit; krijimi i vendeve të reja të punës; Inteligjenca Artificiale; klima, natyra, energjia dhe keqinformimi.
Por ndërsa Shqipëria mungoi, kush ishin të pranishmit në Davos?
Këtë vit në forum kanë qenë të pranishme qeveri nga më shumë se 100 vende; investitorë të ndryshëm; Institucionet financiare ndërkombëtare dhe gazetarë nga e gjithë bota. Nga rajoni, ishin të pranishëm vetëm qeveritë e Kosovës dhe të Serbisë.
Ka mendime të ndryshme nëse një vend duhet apo jo të marrë pjesë në një event të përmasave të tilla, siç është forumi i Davosit. Kjo duke pasur parasysh edhe kostot e larta të pjesëmarrjes dhe qëndrimit atje. Kjo pasi gjithçka është kosto-përfitim.
Pjesëmarrja në Forumin Ekonomik Botëror do të ndihmonte në një promovim të Shqipërisë. Gjithmonë, nëse ne do të ishim pjesë e paneleve të rëndësishme të parashikuara në forum. Në kushtet që nuk ishim dy janë mundësitë: ose Shqipëria nuk ka nevojë më për promovim, nisur nga fakti se vitin që lamë pas patëm 10 milionë turistë ose qeveria jonë nuk ka arritur të ketë akses në panelet e rëndësishme të diskutimit.
Në të gjitha rastet, vlen të theksohet se temat e trajtuara në forum ishin ato që do të dominojnë këtë vit ekonominë globale dhe rrjedhimisht, edhe ekonomitë lokale si ajo e Shqipërisë, e ekspozuar tërësisht nga zhvillimet në botë, për shkak të varësisë së madhe nga importi. Cështje si lufta e interesave, krijimi i vendeve të punës, Inteligjenca Artificiale apo ndryshimet klimaterike. Një pjesë në dukje të largëta, por që së shpejti do të jenë edhe në Shqipëri realiteti i ri. Ndaj në mos kryeministri, të paktën ndonjë ministër mund edhe të kishte shkuar në Davos.
Por çfarë është Forumi Ekonomik Botëror, i njohur ndryshe si Forumi i Davosit?
U themelua në vitin 1971 nga ekonomisti dhe profesori zvicerano-gjerman, Klaus Schwab. Qëllimi ishte bashkimi i sektorit publik dhe privat për të diskutuar dhe gjetur zgjidhje mbi problemet globale, që më pas kanë ndikim direkt në ekonomitë lokale. Në një vit që sapo ka nisur dhe që nuk parashikohet të jetë i qetë.
