Gati gjysmës së propozimeve ju është dhënë “drita jeshile”, 14 janë refuzuar për shkaqe të ndryshme dhe po aq janë aktualisht në proces shqyrtimi.
Është ky bilanci në tetë vite i ligjit për investimet strategjike, përfshirë ato të huaja të miratuar në 2015-n me fabul “ne ta japim falas, ti ndërto diçka”.
“Të paktën investitorët britanikë nuk kana rritur të gjejnë mjedisin e përshtatshëm dhe kornizën ligjore të nevojshme për të investuar në Shqipëri me anë të këtij ligji që do të thosha se është i paplotë,” shprehet Zenel Hoxha nga Dhoma Britanike e Tregtisë.
Pjesa më e madhe e projekteve të propozuara dhe të miratuara, rreth 85 për qind rezultojnë në fushën e turizmit. Të dhënat tregojnë se lista e statuseve të dhëna si “investitorë strategjik” pasohet nga bujqësia, energjia, industria dhe zonat e zhvillimit.
Në një kohë që baza ligjore e ka humbur efektin që më 31 dhjetor, socialistët propozojnë që afati të shtyhet deri në 2027-n. Në parlament është paraqitur tashmë edhe projektligji nga kryetari i komisionit të ekonomisë, Eduart Shalsi.
“Zgjatja e afateve për të pestën herë nuk është zgjidhje. Ligji ka nevojë për ndryshime rrënjësore dhe jo arna.”
Ndryshimet ligjore parashikojnë të rrisin dhe vlerën e investimeve deri në 100 milionë euro për ato projekte që do të marrin statusin “investitor strategjik me procedurë të veçantë”, dhe t’i japin më shumë rol në vendimmarrje ministrive të linjës për të përgatitur studimet dhe kontratat. /A2 CNN
