LIGJET E BIZNESIT
Treguesi i besimit në ekonomi ka shfaqur një trajektore jo të qëndrueshme në dhjetor, duke sinjalizuar se pritshmëritë e bizneseve dhe konsumatorëve për gjendjen e ekonomisë gjatë vitit 2024 janë të ndryshme. Banka e Shqipërisë ka konstatuar se muajin e kaluar Treguesi i Ndjesisë Ekonomike shënoi një rritje prej 2.2 pikësh kundrejt nëntorit.
Përmirësimi i këtij treguesi u përcaktua nga rritja e besimit në sektorët e ndërtimit, shërbimeve dhe më pak nga ai i industrisë. Sektori i tregtisë, si edhe besimi konsumator regjistruan vlera thuajse të njëjta me një muaj më parë.
Treguesi i besimit të industrisë (TBI) u rrit lehtësisht me 0.5 pikë përqindje në muajin dhjetor, i ndikuar nga vlerësimet më optimiste për kontratat porositëse. Niveli i TBI-së aktualisht qëndron 7.3 pikë përqindje mbi mesataren historike. Pritjet e bizneseve të këtij sektori për prodhimin, për punësimin dhe çmimet në të ardhmen janë pothuajse të njëjta me ato të një muaji më parë.
Treguesi i besimit në ndërtim (TBN) u rrit ndjeshëm me 9.1 pikë përqindjeje në muajin dhjetor, duke u ngjitur pranë vlerave më të larta historike. Ky tregues qëndron 30.3 pikë përqindje mbi mesataren afatgjatë. Rritja këtë muaj u përcaktua nga vlerësimet më të larta për aktivitetin aktual ndërtues dhe për nivelin e porosive aktuale. Ndërkohë, edhe pritjet për punësimin dhe ato për çmimet në të ardhmen janë në rritje.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Treguesi i besimit në shërbime (TBSH) u rrit me 2.6 pikë përqindjeje në muajin dhjetor. Niveli i TBSH-së qëndron në intervalin e vlerave më të larta historike, rreth 16 pikë përqindje mbi mesataren afatgjatë. Të dy komponentët përbërës të treguesit, ecuria aktuale e aktivitetit si dhe niveli i kërkesës, kanë regjistruar rritje. Pritjet e bizneseve për kërkesën, punësimin dhe çmimet në të ardhmen janë gjithashtu me rritje.
Treguesi i besimit në tregti (TBT) qëndroi pothuajse i pandryshuar krahasuar me vlerën e një muaji më parë në muajin dhjetor. Kjo vlerë u ndikua kryesisht nga vlerësime të njëjta mbi ecurinë aktuale të biznesit dhe pritjet për punësimin. Niveli aktual i TBT-së qëndron rreth 7.7 pikë përqindje mbi mesataren historike. Nga ana tjetër, pritjet për ecurinë e biznesit dhe çmimet në të ardhmen u vlerësuan në rritje..
Treguesi i besimit konsumator (TBK) në muajin dhjetor regjistroi vlerë të përafërt me atë të muajit paraardhës. Niveli i tij aktual ka kaluar me 1.3 pikë përqindje mesataren historike. TBK-ja këtë muaj u përcaktua nga pritje pothuajse të pandryshuara për situatën e përgjithshme ekonomike, situatën financiare dhe blerjet në shuma të mëdha për të ardhmen.
