LIGJET E BIZNESIT
Shqipëria po bëhet një vend atraktiv për investitorët e huaj. Të dhënat e fundit të Bankës së Shqipërisë tregojnë se në tremujorin e tretë të këtij viti, fluksi i investimeve të huaja i kapërceu 404 milionë euro, duke shënuar një rritje prej 60 milionë euro ose mbi 17% kundrejt të njëjtës periudhë të një viti më parë. Një pjesë e këtyre parave janë riinvestime të kompanive të huaja, që operojnë tashmë në Shqipëri.
Të dhënat tregojnë se vendi që mban peshën më të madhe të investimeve të huaja është Hollanda, kryesisht me kompaninë e kërkimit të naftës Shell. Nga 76.8 milionë euro në tremujorin e tretë të vitit të shkuar, fluksi i investimeve hollandeze në Shqipëri për të njëjtin tremujor të këtij viti është rritur në 86.9 milionë euro.
Ndërkohë që sa i përket ritmit të rritjes, janë flukset e Investimeve nga Mbretëria e Bashkuar ato që kanë shënuar një përshpejtim të fortë këtë vit. Nga 3.46 milionë euro në tremujorin e tretë 2022, flukset e Investimeve nga Britanike thuajse janë trefishuar, duke e mbyllur tremujorin e tretë të këtij viti në kuotën 11.81 milionë euro.
Partneri ynë kryesor tregtar, Italia, është një tjetër vend që ka shtuar fluksin e Investimeve për këtë vit. Flukset rezultojnë thuajse dyfish më të larta se tremujorin e vitit të shkuar, ose nga 22.75 milionë euro, në 41.62. Një tjetër partner i rëndësishëm ekonomik i Shqipërisë, Turqia, gjithashtu ka rritur volumet e investimeve direkte nga 55.7 milionë në tremujorin e tretë të vitit të shkuar, në 58.21 milionë në të njëjtin tremujor të këtij viti. Rritje të ndjeshme për këtë vit kanë shënuar edhe flukset e ardhura nga Kosova dhe Franca, ndërkohë që modeste ka qenë rritja e flukseve të investimeve të reja nga Greqia, si dhe nga Shtetet e Bashkuara të Amerikës.
Ndërkohë që ky tremujor ka shënuar rënie të flukseve të investimeve me origjinë nga Gjermania, partner i rëndësishëm tregtar i vendit tonë. Nga 10.3 milionë euro në tremujorin e tretë 2022, ato rezultojnë 9.17 milionë në tremujorin e tretë të këtij viti.
Për t’u shënuar është se një pjesë e mirë e këtyre investimeve i takojnë tregut të pasurive të paluajtshme, duke qenë se Banka e Shqipërisë i përfshin blerjen e pronave nga jorezidentët në totalin e Investimeve të huaja direkte.
