Tregu i punës në Shqipëri po shfaq dinamika të çuditshme. Të dhënat e fundi të Institutit të Statistikave tregojnë se papunësia në shkallë vendi ka pësuar rënie në tremujorin e tretë të këtij viti, por ajo është rritur tek moshat e reja.
Kështu, sipas statistikave, në këtë periudhë, shkalla zyrtare e papunësisë në Shqipëri, për popullsinë 15 vjeç e lart, është 10.5 %, duke pësuar rënie me 0.03 pikë përqind, krahasuar me të njëjtin tremujor të vitit 2022 dhe është ulur me 0,2 pikë përqind, krahasuar me tremujorin e mëparshëm. Nga një tendencë e kundërt është karakterizuar papunësia tek të rinjtë.
Shkalla zyrtare e papunësisë për të rinjtë 15-29 vjeç është 22,0 %. Krahasuar me tremujorin e tretë të vitit 2022, shkalla e papunësisë për të rinjtë, është rritur me 1,6 pikë përqindje. Krahasuar me tremujorin e dytë 2023, ky tregues është ulur me 0,3 pikë përqindje.
Rritja e papunësisë tek moshat e reja tregon për mungesën e interesit të tyre për t’u integruar në tregun e punës, pasojë edhe e ofertës së kufizuar të vendeve të punës apo cilësisë së tyre nga biznesi.
