Shpërblimi i fundvitit për pensionistët, shpërndarja nis nga 1 dhjetori

Nga 1 dhjetori, pensionistët do të mund të tërheqin shpërblimin e fundvitit. Bëhet fjalë për shumën prej 5 mijë lekë për pensionist që do të shpërndahet në formën e bonusit së bashku me pagesën mujore të pensionit. përfitues të shpërblimit të fundvitit atë që ndryshe njihet si pagesa për “gjelin e detit” janë rreth 687 pmijë pensionistë, nga të cilët mbi 585 mijë në qytet dhe rreth 101 mijë në fshat.

Shpërndarja e pagesës do të bëhet sipas grafikut të zakonshëm, pra në datat kur të moshuarit apo kategoritë e tjera të përfituesve tërheqin pensionin. Instituti i Sigurimeve Shoqërore tregon se tërheqja e pagesës mund të bëhet edhe pas datës 31 dhjetor, madje deri në tre vite pas kësaj date.

Fondi në dispozicion për bonusin e këtij viti është në vlerën e 3.5 miliardë legëve, ndërsa në 2024-n shuma do të rritet në 3.6 miliardë lekë.

Prej vitit 2022, shpërblimi i fundvitit është përcaktuar si zë i veçantë buxhetor dhe planifikohet që në fillim të vitit. Ndërkohë, pas marrjes së bonusit, pensionistët duhet të presin tetorin e vitit të ardhshëm për të marrë indkesimin, e parashikuar nga ligji, i cili synon amortizimin e rritjes së cmimeve.