Euro e dobët dhe rritja e kostove të lëndëve të para kanë goditur eksportet. Të dhënave e fundit të Instituti të Statistikave tregojnë se në tetor 2023 eksportet e mallrave arritën vlerën 37 miliardë lekë, duke u ulur me -4,3 %, në krahasim me të njëjtën periudhë të një viti më parë dhe duke u rritur me 8,8 %, në krahasim me Shtator 2023. Ndërsa si periudhë 10-mujore, eksportet arritën vlerën 370 miliardë lekë, duke u ulur me -8,6 % krahasuar me një vit më parë.
Grupet që kanë ndikuar në ecurinë e eksporteve
Gjatë muajit Tetor 2023, në uljen e eksporteve prej -4,3 %, kanë ndikuar grupet: “Tekstile dhe këpucë” me -3,6 pikë përqindje, “Makineri, pajisje dhe pjesë këmbimi” me -0,8 pikë përqindje, “Prodhime druri dhe letre” me -0,8 pikë përqindje, etj. Ndërsa pozitivisht kanë ndikuar grupet: “Minerale, lëndë djegëse, energji elektrike” me +1,0 pikë përqindje, “Materiale ndërtimi dhe metale” me +0,5 pikë përqindje dhe “Produkte kimike dhe plastike” me +0,4 pikë përqindje.
Eksportet, gjatë këtij dhjetëmujori janë ulur me -8,6 %, krahasuar me një vit më parë. Grupet që kanë ndikuar negativisht në uljen vjetore të eksporteve, janë: “Materiale ndërtimi dhe metale” me -6,4 pikë përqindje, “Minerale, lëndë djegëse, energji elektrike” me -1,2 pikë përqindje, “Tekstile dhe këpucë” me -1,2 pikë përqindje, etj. Ndërsa pozitivisht kanë ndikuar grupet: “Ushqime, pije, duhan” me +1,3 pikë përqindje dhe “Makineri, pajisje dhe pjesë këmbimi” me +0,3 pikë përqindje.
Eksportuesit dhe veçanërisht fasonistët kanë dhënë alarmin për gjendjen e vështirë në të cilën ndodhen, kryesisht për shkak të rënies së euros. Ata kanë kërkuar kompensim nga qeveria për humbjet dhe ndërhyrjen e Bankës së Shqipërisë në kursin e këmbimit.
