Nga Aurora Sulce
Bizneset janë agjenti kryesor në ekonomi. Ata që krijojnë vende pune, kontribuojnë me taksa në buxhetin e shtetit dhe lënë vlerë të shtuar në ekonomi. Po cfarë biznesesh kemi në Shqipëri dhe si është gjendja e tyre?
Sipas të dhënave zyrtare, në të gjithë vendin janë aktive mbi 104 mijë ndërmarrje, në të cilat janë të punësuar rreth 520 mijë persona. Por specifika e ekonomisë sonë është se 99.8% e këtyre bizneseve janë ndërmarrje të vogla dhe të mesme. Ndërkohë që vetëm 0.2% janë biznese të mëdha, me mbi 250 të punësuar.
Por cilët janë sektorët ku janë përqëndruar më së shumti këto biznese?
Sipas të dhënave, pjesa dërrmuese e tyre ose më saktësisht 86.8% janë në sektorin e shërbimeve, si tregti, akomodim, transport etj. Ndërkohë që vetëm 13.2% janë në prodhim, në sektorë si industria nxjerrëse, ajo përpunuese, energji elektrike, ndërtim etj. Këto shifra tregojnë qartë se ekonomia jonë është shumë e pak e orinetuar tek prodhimi.
Por si është të bësh biznes në Shqipëri? E lehtë apo e vështirë?
Shoqatat e sipërmarjes dhe jo vetëm, edhe institucionet financiare ndërkombëtare publikojnë vazhdimisht raporte lidhur me klimën e të bërit biznes. Raporti i fundit i kësaj natyre është ai i Shoqatës së Investitorëve të Huaj, publikuar vetëm pak javë më parë.
Nga ky raport rezultoi se elementët pozitivë të klimës së biznesit në vendin tonë janë pritshmëritë për situatën ekonomike; legjislacioni fiskal dhe raportet me administratën tatimore dhe atë doganore.
Por investitorët e huaj evidentojnë edhe problematika, një pjesë e tyre të trashëguara në vite, cka tregon se nuk po marrin zgjidhje. Shqetësimet kryesore për një investitor sot në Shqipëri është mungesa e fuqisë punëtore; mungesa e transparencës; korrupsioni dhe kostot e larta të prodhimit./A2 CNN
