Nga Aurora Sulce
Rishikimi i buxhetit vetëm pak ditë më parë ekspozoi edhe më qartë politikat e qeverisë, të cilat përherë e më shumë po shkojnë drejt personalit dhe rirtjes së pagave dhe më pak drejt investimeve dhe mbështetjes së shtresave në nevojë.
Të dhënat zyrtare tregojnë se numri i të punësuarve në amdinistratën shtetërore ka pësuar rritje të vazhdueshme vitet e fundit, duke kulmuar në mbi 184 mijë persona vitin që lamë pas.
Të njëjtën tendencë në rritje të fortë kanë pësuar edhe pagat, vecanërisht me rritjen e këtij viti, në kuadër të premtimit të kryeministrit për pagë 900 euro në sektorin publik. Të dhënat tregojnë se në fund të qershorit, paga mesatare në shtet kapërceu 82 mijë lekë, me rritje rreth 14 mijë lekë kundrejt një viti më parë.
Duhet pasur parasysh, se rritja e numrit të të punësuarve në shtet dhe respektivisht edhe pagat e tyre përkthehen në kosto të shtuara për buxhetin e shtetit. Për të kuptuar sesa janë këto kosto, le ti krahasojmë me investimet.
Në buxhetin e rishikuar të këtij viti, shpenzimet kapitale me financim të brendshëm apo thënë ndryshe investimet e kryera nga paratë e taksapaguesve vlerësohen në 86 miliardë lekë ose sa 4% e Prodhimit të Brendshëm bruto. Ndërkohë që shpenzimet për personelin, apo administratën shtetërore kanë arritur në rreth 98.8 miliardë lekë ose sa 4.5% e PBB-së, duke qenë 12.8 miliardë lekë më të larta sesa investimet.
Kjo rritje e ndjeshme e shpenzimeve për amdinistratën ndodh në një kohë kur qeveria ka shpallur si prioritet publik digjitalizimin e shërbimeve publike, si instrument për të rritur eficencën dhe për të ulur kostot e përgjithshme të burimeve njerëzore.
Por cfarë po ndodh aktualisht është që pavarësisht këtij objektivi të shpallur, në realitet kemi të bëjmë me një përplasje të qartë prioritetesh, ku paraja publike po shpenzohet përherë e më shukmë për të futur dhe mbajtur njerëz në punë./A2 CNN
