LIGJET E BIZNESIT
Llogaritet në rreth 19.4 miliardë lekë lekë ose rreth 182 milionë euro dëmi që institucionet shtetërore i kanë shkaktuar buxhetit të shtetit në 8 muajt e parë të vitit. Kontrolli i Lartë i Shtetit ka publikuar raportin e auditimit për periudhën janar-gusht 2023, ku ka konstatuar se shkeljet ndahen në dy pjesë: dëmi ekonomik me një vlerë 4.78 miliardë lekë dhe menaxhimi jo efektiv i fondeve që llogaritet në 17.7 miliardë lekë.
“Gjatë periudhës janar – gusht 2023, janë dhënë 424 rekomandime mbi gjetje me efekte negative në buxhetin e shtetit, për total vlerën 19,496,811 mijë lekë, nga të cilat: dëmi ekonomik vlerësuar 4,780,006 mijë lekë, dhe menaxhimi jo efektiv i fondeve në vlerën 14,716,805 mijë lekë”, theksohet në raportin e KLSH.
Kontrolli i Lartë i Shtetit evidenton se rreth 99.8% e efekteve financiare me pasojë dëm ekonomik në buxhetin e shtetit, është konstatuar në fushën e shpenzimeve (4,771,768 mijë lekë) ku, rreth 99.8% e efekteve financiare me pasojë dëm ekonomik është konstatuar në fushën e shpenzimeve (4,771,768 mijë lekë). Shkeljet më të mëdha me rreth 63% e totalit të shpenzimeve e zë vlera 3,027,968 mijë lekë e konstatuar në subjektin Albpetrol SHA Patos, si pasojë e detyrimeve që kanë shoqëritë koncensionare ndaj shoqërisë për energjinë e shitur/faturuar me dhe pa kontrata;
- rreth 29% e totalit të shpenzimeve, ose 1,368,491 mijë lekë është konstatuar përsëri në subjektin Albpetrol SHA Patos, si pasojë e maturimit të penaliteteve e kamatëvonesave për mos kryerjen e pagesave për energjinë elektrike nga kompania Bankers Petroleum;
- rreth 4% e totalit të shpenzimeve e zënë vlerat në “Shpenzime për paga dhe shpërblime”, në shumën 179,515 mijë lekë, e konstatuar si në AlbPetrol SHA Patos, si pasojë e pagesave gjoba dhe kamatvonesa në lidhje me detyrimet për sigurimet shoqerore dhe shëndëtesore si dhe përfitimin e shpërblimeve për anëtaret e vet padrejtësisht;
- rreth 3% e totalit të shpenzimeve i takojnë zërit “Shpenzime në procedura prokurimi dhe zbatim punimesh” në shumën 131,225 mijë lekë, ku renditen subjektet si: AKSHI – 18,442 mijë lekë, UKT SHA – 15,457 mijë lekë, Albpetrol SHA Patos – 14,172 mijë lekë, dhe Hekurudha Shqiptare SHA – 10,786 mijë lekë.
Sa i takon menaxhimit jo efektiv të fondeve, vlera totale prej 14,716,805 mijë lekë u konstatua: në fushën e të ardhurave prej 3,722,718 mijë lekë (ose rreth 25% e totalit). Nga këto shkelje, rreth 63% e totalit të ardhurave me ndikim negativ janë si shkelje të legjislacionit tatimor në 21 njësi të vetëqeverisjeve vendore; vlera 994,281 mijë lekë në fushën e shitjes, blerjes dhe dhënies me qira të pasurisë shtetërore, në 16 subjekte ku rreth 48% të saj e zë vlera prej 481,859 mijë lekë e konstatuar në Ministrinë e Bujqësisë dhe Zhvillimit Rural; dhe në fushën e shpenzimeve prej 10,994,087 mijë lekë (ose rreth 75%), si rezultat i shkeljeve të disiplinës buxhetore lidhur me likujdimin e shpenzimeve, keqmenaxhimin e fondeve të programuara apo mungesë kontrolli në realizimin e procedurave të prokurimit jo në përputhje me kuadrin ligjor.
Bazuar në shkeljet e gjetura, KLSH ka adresuar tek subjektet e audituara 583 rekomandime për masa disiplinore, nga të cilat 542 masa disiplinore dhe 41 masa administrative.
