LIGJET E BIZNESIT
Në tremujorin e dytë të këtij viti, papunësia tek të rinjtë në Shqipëri u rrit, në një kohë kur bizneset në pothuajse të gjithë sektorët e ekonomisë po vuajnë mungesën e fuqisë punëtore.
“Shkalla zyrtare e papunësisë për të rinjtë 15-29 vjeç është 22,3 %. Krahasuar me tremujorin e dytë të vitit 2022, shkalla e papunësisë për të rinjtë, është rritur me 2,1 pikë përqindje”, theksohet në raportin e INSTAT.
Por cfarë po ndodh me tregun e punës dhe papunësinë tek të rinjtë që i përkasin Gjeneratës Z?
“Është e vërtetë që kërkohen punëtorë, por shpeshherë punëdhënësit në Shqipëri janë me kulturën e vjetër, që punonjësi do të vijë, do të punojë 8 orë, do paguhet dhe kaq ishte. Ndërkohë që të rinjtë e Gjeneratës Z të lindur nga 1995 deri në 2010 kanë pritshmëri të tjera nga punëdhënësi.
Ata synojnë jo vetëm një pagë të mirë, të cilën shpeshherë e kanë si faktor dytësor, por kërkojnë që ambienti të jetë motivues, të respektohet balanca mes jetës private dhe punës, pra kërkojnë një mirëqenie mendore”, shpjegon për median Lutjona Lula, eksperte për çështjet e rinisë.
“Ata pretendojnë që punëdhënësi t’u japë detyra kuptimplota, pra kanë nevojë që të ndjejnë se po kontribuojnë në diçka, në një proces të rëndësishëm, dhe jo një punë të rëndomtë. Kanë dëshirë të punojnë të pavarur, dhe të lihen të lirë në bërjen e një detyre. Në të kundërt e ka shumë të lehtë për ta lënë atë vend pune dhe të dalë në treg si punëkërkues. Nuk duhet të harrojmë edhe faktorët kontekstualë për sa i përket Shqipërisë, pjesa ekonomike, pagat e ulëta, emigrimi i të rinjve. Kjo gjeneratë është e para në historinë e njerëzimit që e ka gjetur internetin dhe teknologjinë aty që kur ka lindur, kështu që edhe qasja me tregun e punës është e ndryshme”, shtoi ekspertja.
