Ekonomia pa prodhim, shifrat që dëshmojnë për varësinë e madhe nga ushqimet e importit

Nga Aurora Sulçe

Banka Botërore ka publikuar raportin mbi ecurinë e ekonomisë së rajonit. Në analizë është marrë edhe ekonomia shqiptare, ku janë bërë disa konstatime domethënëse.

Institucioni financiar ndërkombëtar vlerëson se një ndër burimet kryesore të rritjes ekonomike këtë vit, që parashikohet disi më optimiste në 3.6%, është konsumi. Ndërkohë që konstatimi i dytë është që bujqësia shqiptare mbetet një sektor i vakët, me një ecuri anemike. Në një deduksion logjik kjo do të thotë se konsumi i popullatës bazohet tek mallrat e importit. Konstatimi i tretë i Bankës botërore është se një ndër risqet e ekonomisë për këtë vit është rritja e çmimeve të ushqimeve.  Kjo  tregon jo vetëm për varësinë, por edhe për ekspozimin shumë të madh të ekonomisë dhe buxheteve familjare ndaj luhatjes së cmimeve në tregjet ndërkombëtare.

Për ta mbështetur një përfundim të tillë, le të shohim ecurinë e importeve dhe eksporteve.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Të dhënat tregojnë eksportet kanë pësuar një rritje konstante, por të ngadaltë vitet e fundit, përkundrejt një rritje më të shpejtë të importeve. Vitin e kaluar, ne kemi importuar mallra gati dyfish më shumë sesa kemi eksportuar. Një dëshmi e qartë e nivelit të ulët të prodhimit shqiptar.

Por ndërsa kemi varësinë më të lartë në importe nga vendet e rajonit, Shqipëria ka sektorin bujqësor me peshë në prodhimin e brendshëm bruto, me 20% të PBB-së, gati 2 herë më të lartë se mesatarja rajonale dhe 6 herë më të lartë se mesatarja europiane.

Edhe pse ka klimë të përshtatshme dhe burimet ujore të favorshme për kulturat bujqësore, prodhimet shqiptare nuk janë konkurruese pasi qeveria jep nivelin më të ulët të subvencioneve për sektorin në krahasim me rajonin. Kjo bën që qytetarët shqiptarë të paguajnë më shtrenjtë për produktet ushqimore.

Sipas të dhënave zyrtare, rritja e çmimeve tek ushqimet është gati dyfish më e lartë se inflacioni i përgjithshëm. Në shtator, kjo rritje ka qenë 7.9%, duke rënduar jo pak familjet dhe kryesisht ata me të ardhura të ulëta./A2 CNN