Rreziku i përshkallëzimit të konfliktit në Izrael, ish ministri i Financave: Do të sillte probleme të mëdha sociale

Konflikti i rizgjuar ndërmjet Hamasit dhe Izraelit nuk po kalon pa faturën e tij në ekonominë botërore. Një rritje e menjëhershme e çmimit të karburanteve fosile është shënuar në bursa. Për prekjen e ekonomisë shqiptare nga konflikti në Izrael, por edhe më gjerë, u diskutua në emisionin A2 Business të gazetares Aurora Sulce.

Arben Malaj, ish-ministër i Financave, u shpreh se nëse konflikti do të përhapej edhe më tej do të sillte probleme të mëdha sociale në botë pasi do të kishin një rritje të çmimeve.

“Në këtë konflikt patjetër që ka faktorë gjeopolitikë. Nuk është thjeshtë një goditje e rastit e Hamasit, kjo për shkak se kishte përpjekje maksimale nga SHBA që ta ndihmonte Izraelin për të bërë marrëveshje me disa nga vendet e rajonit që e konsideronin vend armik.

Ekspertët vlerësojnë se për të folur për përmasat ndoshta është akoma shpejt. Janë 3 faktorë duke u analizuar. E para, nëse do të ketë një ballafaqim një ballafaqim ushtarak mes Iranit dhe Izraelit, i cili është prodhuesi i shtatë i naftës në botë. Të gjithë janë skeptikë. Një moment është a do të ketë përplasje ushtarake, por momenti i dytë është nëse do të aplikojnë SHBA-të sanksione ndaj Iranit. Kjo ndërhyrje do të kishte pasoja negative, pasi do të ulte ofertën dhe do të rriste çmimin. Kjo është aktualisht në nivele të menaxhueshme, por nëse lufta do të përhapej, ekspertët parashikojnë se naftë mund të shkonte deri në 110 dollarë. Ky nivel do të ishte kritik, pasi do të kishte efekt zinxhir dhe do të vinte pas pandemisë dhe luftës në Ukrainë, kur bankat qendrore po merrnin pak frymë për të mos e rritur koston e parasë dhe inflacionit.

Në momentin që do të kemi një trend në rritje, do të kishim probleme të mëdha sociale sepse në kohë krize të pasurit bëhen më të pasur dhe të varfrit varfërohen më shumë”, tha Malaj./A2 CNN