LIGJET E BIZNESIT
Nga 1 janari 2026 në fuqi do të hyjë taksa e re e pronës, e cila do të përllogaritet mbi vlerën reale të tregut dhe jo mbi bazën e referencave, sic është aktualisht. Por ndërsa ekspertët paralajmërojnë se kostot për qytetarët do të rriten ndjeshëm, për shkak të shtrenjtimit të pasurive të patundshme në Shqipëri, Ministria e Financave po sheh mundësinë e subvencionit të pensionistëve për këtë taksë. Lajmi është bërë i ditur në emisionin A2 Business të gazetares Aurora Sulce nga drejtori i Përgjithshëm i Taksës për Pasuritë e Patundshme në Ministrinë e Financave, Lavdrim Sahitaj.
Sipas tij, sa i përket ndryshimeve që pritet të sjellë ligji i ri, një nga kryesoret është kalimi i pasurisë mbi bazë të vlerës së tregut, kjo për të qenë sa më objektiv, transparent dhe më korrekt me taksapaguesit.
“Një nga ndryshimet kryesore është kalimi i pasurisë mbi bazë të vlerës së tregut, kjo për të qenë sa më objektiv, transparent dhe më korrekt me taksapaguesit. Ligji i ri ka një sërë risish, në të cilën përjashtohen një sërë pronash, si ato shtetërore, fetare, resortet që janë “brand-name”.
Nga ana tjetër, është edhe një kategori tjetër që përjashtohet nga taksa e pasurisë, është në diskutim e sipër, e cila është grupi i pensionistëve që janë të vetëm në certifikatën familjare, grupi i familjeve me ndihmë ekonomike dhe invalidët.
Po mendohet që të ketë një skemë subvencionimi për këto shtresa, për ta pasur më të lehtë. Ne e kemi ende në diskutim”, ka deklaruar Sahitaj.
Ndërkohë për drejtorin e Institutit për Bashkitë e Shqipërisë, Agron Haxhimali, qytetarët dhe bizneset do të paguajnë më shumë nga taksa e re e pronës, ndërkohë që qeveria nuk po merr asnjë masë për zgjerimin e bazës. E thënë ndryshe, për të detyruar ata që deri më tani nuk kanë paguar, që të shlyejnë detyrimet.
