Rritje rekord prej 286 milionë euro për depozitat në euro. Nuk kanë ndikuar vetëm emigrantët

Emigrantët u kthyen në verë në atdhe jo vetëm për pushime, por edhe për të mbyllur kursimet e tyre në banka. Sipas të dhënave të Bankës së Shqipërisë,  Në fund të gushtit, stoku i kursimeve në euro arriti në 7.1 miliardë euro, me një rritje prej 4.2% në krahasim me muajin e mëparshëm, ose 286 milionë euro më shumë. Kjo është rritja më e madhe mujore që kur Banka e Shqipërisë raporton të dhënat, nga dhjetori 2015. Kursimet e individëve kanë ndikuar në gati 60% të rritjes.

Me bazë vjetore, depozitat në euro janë rritur me 16.5%, ose 1 miliardë euro më shumë.

Në korrik dhe në gusht depozitat në valutë njohin gjithmonë rritje të fortë të ndikuara nga prurjet e emigrantëve.

Vitet e fundit ndikim ka dhënë dhe ecuria e mirë e turizmit, që sjell më shumë valutë në vend si përmes konsumit, hotelerisë, ashtu dhe individëve që japin shtëpitë me qira ditore, një tendencë që sa vjen e po bëhet gjithnjë e më e fortë, sidomos në muajt e verës.

Nga ana tjetër, euro mbetet monedha më e besuar e shqiptarëve, pavarësisht rënies që po pëson prej mëse një viti. Kjo do të thotë se shumë nga ata që kanë mundësi kursimi, i kthejnë paratë e tyre në euro dhe i depozitojnë.