LIGJET E BIZNESIT
Vetëm 18% e kompanive shqiptare investojnë në “Kërkim dhe zhvillim” në Shqipëri. Shifra që tregon një nivel alarmant të investimit të bizneseve vendase në atë që duhet të ishte promotori i tyre i zhvillimit është dhënë në Strategjinë Kombëtare për Kërkimin Shkencor, Teknologjinë dhe Inovacionin 2023–2030, e publikuar tashmë në Fletoren Zyrtare.
“Biznesi shqiptar ka filluar të zhvillohet me vonesë pas viteve ‘90. Dhe një pjesë e mirë e drejtuesve të biznesit, persona që pothuajse i takojmë çdo ditë, nuk e njohin aq shumë teknologjinë, pastaj po të flasim për kërkimin shkencor është inekzistent“, shpjegon eksperti Erion Demiri.
Teksa thekson se vetëm 0.03% e Produktit të Brendshëm Bruto për kërkimin shkencor është e pamjaftueshme për të forcuar lidhjen midis biznesit dhe akademisë, strategjia vë në dukje nevojat që vendi ka.
Hartimi i një metodologjie për krijimin e fondeve për kërkimin dhe shkencën, por dhe zhvillimi i politikave inovative që synojnë promovimin e lidhjeve më të mira ndërmjet akademisë, industrisë dhe qeverisë, janë masat që duhet ndërmarrë.
“Kërkimi shkencor sidomos në ndërmarrjet e prodhimit ka të bëjë me faktin se t’i duhet të kesh persona që merren me të dhe me zhvillimin e produkteve të reja. Në çastin kur shumica e ndërmarrjeve nuk merren me krijimin e produkteve të reja, por merren me tregti ose ofrim shërbimesh është e qartë se koncepti që ata kanë sesi duhet të funksionoj kërkimi shkencor apo si duhet të penetrojë teknologjia në biznesin e tyre, është një qasje shumë e ngadaltë”.
Përdorimi i teknologjisë në ndërmarrjet shqiptare në nivele të ulëta, raportohet edhe nga INSTAT teksa vetëm 30% e të punësuarve kishin një kompjuter me akses në internet në 2022.
