LIGJET E BIZNESIT
Luhatjet e forta në kursin e këmbimit kanë shkaktuar pasojat e pritshme. Banka e Shqipërisë konstaton se si pasojë e forcimit të lekut kundrejt euros dhe valutave të tjera janë ngadalësuar kreditë dhe depozitat. Vlerësimi është bërë në përfundim në mbledhjes së Këshillit Mbikëqyrës së BSH-së.
Institucioni mbikëqyrës bankar evidenton se në gjashtëmujorin e parë të vitit 2023 (më tej, “periudha”), veprimtaria e sektorit bankar u zhvillua në mënyrë të qëndrueshme. Në tërësi, depozitat dhe kreditë u zgjeruan, por ritmet e rritjes ishin më të ulëta se në periudhat e mëparshme, duke reflektuar ndikimin e mbiçmimit të ndjeshëm të kursit të këmbimit të lekut. Në kushtet e nivelit më të lartë të normave të interesit, cilësia e kredisë pësoi një rënie të lehtë, por kreditë me probleme mbeten sërish në nivelet më të ulëta historike.
“Në tërësi, ekspozimi i sektorit bankar ndaj rreziqeve u paraqit i kontrolluar por rreziqet e kreditit dhe të tregut kërkojnë monitorim të vazhdueshëm. Rezistenca e sektorit bankar ndaj rreziqeve vlerësohet e mirë, në kushtet kur treguesit e kapitalizimit mbetën në nivele të përshtatshme ndërsa performanca financiare u përmirësua në mënyrë të ndjeshme”, thekson BSH.
Zhvillimet ekonomike gjatë periudhës ishin pozitive, ndikuar nga ecuria e mirë e konsumit dhe e investimeve, dhe veçanërisht nga përmirësimet në llogarinë korrente të bilancit të pagesave. Rritja ekonomike u shoqërua me ulje të papunësisë dhe rritje të punësimit e të pagave.
Politika fiskale ruajti një prirje konsoliduese në kushtet e rritjes së ndjeshme të të ardhurave fiskale. Presionet inflacioniste erdhën në rënie por norma e inflacionit mbeti mbi objektivin e Bankës së Shqipërisë, duke reflektuar gjithnjë e më shumë kontributin e faktorëve ekonomikë të brendshëm. Banka e Shqipërisë vijoi me normalizimin e politikës monetare duke theksuar se reagimi i saj i mëtejshëm do të reflektojë zhvillimet në faktorët përcaktues të inflacionit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Banka e Shqipërisë konstaton se rreziqet për zhvillimet ekonomike dhe financiare në vend mbeten të pranishëm. Ato lidhen me pasigurinë që mbartin zhvillimet gjeopolitike dhe të tregjeve ndërkombëtare, por edhe me ecurinë e inflacionit dhe ndikimin e rreziqeve të tregut. “Në këto kushte, mbetet e rëndësishme që politikat ekonomike të synojnë ruajtjen e stabilitetit makroekonomik, ndërsa institucionet financiare dhe autoritetet mbikëqyrëse të ndërmarrin veprimet e nevojshme për të forcuar rezistencën e sistemit financiar”, theksohet në njoftimin e BSH-së.
Këshilli Mbikëqyrës ka miratuar edhe një ndryshim në rregulloren “Për licencimin dhe ushtrimin e veprimtarisë së shoqërive të kursim-kreditit dhe të unioneve të tyre”.
