Emrat e rinj të qeverisë sot tek Presidenti, kush ndryshoi

Kryeministri Rama pritet të dërgojë sot në Presidencë për dekretim ndryshimet në kabinetin qeveritar, njoftuar një ditë më parë prej tij në Asamblene e Partisë Socialiste. Do të jetë presidenti Begaj që do të dekretojë shkarkimin e ministrave të deritanishëm dhe emrat e rinj që do t’i zëvendësojnë ata.

Një ditë më parë Rama bëri disa ndryshime në qeveri. Ministre e Ekonomisë dhe Financave nuk do të jetë më Delina Ibrahimaj. Në vendin e saj do të jetë Ervin Mete. Ibrahimaj do të mbajë tashmë postin e ministrit të Shtetit për Mbrojtjen e Sipërmarrjes.

Ogerta Manastirliu largohet nga posti i Ministrisë së Shëndetësisë dhe Mirëqenies Sociale për të drejtuar Ministrisë e Arsimit dhe Sportit.

Në krye të Shëndetësisë vjen Albana Koçiu, e cila më herët ka mbajtur pozicionin e Drejtorit të Departamentit të Administratës Publike.

Ministria e Bujqësisë do të ketë një tjetër ministre. Tashmë këtë institucion do ta drejtojë ish-ministrja e Financave Anila Denaj.

Igli Hasani do të jetë Ministër për Europën dhe Punët e Jashtme, ndërsa Arbi Mazniku mori postin e ministrit të Shtetit për Pushtetin Vendor.

Kryeministri Rama njoftoi se Ministria e Shtetit për Standardet dhe Shërbimet do të shkrihet. Nga ndryshimet e fundit, ministret Olta Xhaçka, Frida Krifca, Evis Kushi dhe Edona Bilali nuk do të jenë më pjesë e qeverisë.