Viti i mbarë për KESH, reshjet shndërrojnë Shqipërinë në eksportues neto energjie

Reshjet e dendura në pjesën e parë të vitit kanë ndihmuar Korporatën Elektroenergjetike Shqiptare, që jo vetëm të plotësojë nevojat e vendit me energji, por edhe të eksportojë në nivele të kënaqshme. Të dhënat e fundit të Institutit të Statistikave ilustrojnë një situatë krejt të ndryshme nga ajo e një viti më parë, ku Shqipëria kishte varësi të plotë nga importet.

Sipas INSTAT, prodhimi nga hidrocentralet publike dhe ato private, së bashku me një pjesë të vogël nga fotovoltaikët, në periudhën janar-qershor arriti në 5 TWh, nga 3.6 teravat vitin e shkuar, apo gati 40% më shumë energji e prodhuar.

Reshjet e favorshme ndihmuan, që ndryshe nga viti i shkuar, ku u detyruam të importojmë për pjesën më të madhe të vitit, kësaj radhe të kthehemi në një eksportues neto të energjisë elektrike, me mbi 1 teravatorë.

Ndërkohë, në muajt korrik dhe gusht, KESH u detyrua t’i rikthehet importeve, përmes 5 ankandeve të ndryshme, duke shpenzuar 23.7 milionë euro për rreth 215 GWh, me një çmim mesatar prej 110 euro/njësi.

Megjithatë, importet për periudhën e thatë të verës janë krahasimisht më të ulëta se vitet e shkuara dhe rezerva energjetike e kaskadës është ndjeshëm mbi mesataren historike, duke bërë që vendi të presë më i qetë stinën e reshjeve. Nëse shirat nuk do të vonojnë, Shqipëria mund ta mbyllë të gjithë vitin si një eksportues neto të energjisë elektrike, siç ka ndodhur pak herë dekadat e fundit. Kjo në një periudhë kur çmimet në bursa po rriten sërish.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern