Të huajt vijnë, shqiptarët ikin. Rriten me 48% kontratat e sigurimit të mjeteve që dalin nga kufiri

Ndërsa Shqipëria po preferohet shumë nga të huajt këtë vit, shqiptarët zgjedhin të largohen jashtë vendit për pushime apo qëllime të tjera. Kjo konfirmohet nga rritja e ndjeshme e sigurimit të automjeteve në kufi. Sipas të dhënave të Autoritetit të Mbikëqyrjes Financiare, gjatë muajve  janar-korrik të këtij viti, për produktin “Karton Jeshil” pati një rritje të numrit të kontratave prej 48.25% krahasuar me të njëjtën periudhë të një viti më parë.

Kjo u shoqërua edhe me një rritje prej 4.17% të vëllimit të primeve të shkruara bruto. Në total, për 7 muajt e parë të vitit janë paguar rreth 10 milionë euro në portofolin e kartonit jeshil. Ecuri të tillë në rritje ka shënuar edhe produkti i sigurimit të kalimit kufitar.

Për periudhën janar-korrik 2023, pati një rritje 4.46% të vëllimit të primeve të shkruara bruto krahasuar me muajin janar-korrik 2022. Edhe numri i kontratave u rrit me 18.40%.

Pak ditë më parë Instituti i Statistikave publikoi të dhënat për lëvizjen e shtetasve, ku konstatoi se gjatë 7-mujorit të këtij viti, mbi 3.7 milionë shqiptarë kishin dalë nga territori, me rritje 21.4 % kundrejt të njëjtës periudhë të një viti më parë.