Taksa e pronës/ Hotelet me 5 yje nuk do të paguajnë. Ja kush shpëton tjetër

Projektligji “Për taksën mbi pasurinë e paluajtshme”, që është hedhur nga qeveria për konsultim publik, parashikon përjashtimin e disa kategorive nga pagesa e kësaj takse. Në draft përcaktohet se hotelet dhe resortet me katër yje, pronat fetare dhe ato me kryefamiljar që janë me pension pleqërie ose invaliditeti nuk do të paguajnë taksën e pronës.

Projektligji parashikon që përjashtim të ketë edhe për pronat shtetërore që janë dhënë me qira.

Lehtësi pritet të ketë dhe për të gjitha ato familje që trajtohen me asistencë sociale, si dhe për ato ku kryefamiljarët janë të paaftë për të punuar dhe për të siguruar të ardhura. Por nuk mbaron me kaq. Nga kjo nismë ligjore përjashtim nga taksimi do të ketë dhe për ato ndërtesa të cilat shërbejnë si banesa sociale si dhe për pasurit kulturore.

Por përfitimin më të madh nga ky projektligj e kanë hotelet dhe resorte me katër dhe pesë yje që gëzojnë statusin special sipas përcaktimit të legjislacionit në fuqi, dhe që janë mbajtës të një marke tregtare të regjistruar dhe të njohur ndërkombëtarisht si “Brand Name”.

Projektligji për taksën e pronës pritet të kalojë në Kuvend për miratim me nisjen e sesioni të ri parlamentar në shtator.