Për qeverinë është bërë i pashmangshëm mos krijimi i detyrimeve të prapambetura. Por shqetësues është fakti i borxheve tek Instituti i Sigurimeve Shoqërore.
Sipas të dhënave të Ministrisë së Financave, detyrimet e prapambetura të administratës qendrore arritën në 6.7 miliardë lekë në fund majit të këtij viti. Ndërkohë 2.8 për qind e shumës rreth 160 milionë lekë ishin sigurimeve shoqërore të papaguara në kohë.
Kjo do të thotë se edhe punonjësit e administratës shtetërore nuk e kanë të sigurtë pensionin kur të arrijnë moshën, për shkak të mosshlyerjes të detyrimeve nga administrata, edhe kontributet u mbahen nga paga.
Të dhënat tregojnë se borxhi ndaj sigurimeve shoqërore është duke u rritur me ritme të shpejta vitet e fundit. Sipas Drejtorisë së Përgjithshme të Tatimeve, në fund të vitit 2022 stoku i këtij detyrimi arriti në 20,5 miliardë lekë ose rreth 200 milionë euro, duke shënuar një rritje prej 48% kundrejt një viti më parë.
Një situatë e tillë bëhet alarmante edhe për faktin se vendos në vështirësi skemën e pensioneve, e cila aktualisht financohet në një masë të madhe nga buxheti i shtetit.
