LIGJET E BIZNESIT
Të marrësh një kredi tani të kushton shumë më shtrenjtë. Kjo pasi interesat e huave janë rritur, si për bizneset, ashtu edhe për qytetarët, në ndjekje të rritjes së normave referencë në tregun ndërkombëtar. Në këto të fundit, eurobori 12-mujor shënoi një normë interesi prej 4.0% në muajin qershor, nga 0.29% që ishte në të njëjtin periudhë të një viti më parë. Kjo ecuri u reflektua tek interesat e kredive në vendin tonë.
Kështu, sipas të dhënave të Bankës së Shqipërisë, interesi mesatar i kredisë së re në euro për bizneset rezultoi mesatarisht 6.1% në tremujorin e dytë, nga 5.4% që ishte në dy tremujorët paraardhës. Rritja e interesave ka qenë më e theksuar tek kreditë e vogla (deri në 250 mijë euro) dhe ato të mesme (250 mijë deri në 1 milion euro).
Në krahasim me vitin e kaluar, interesi mesatar i kredive në euro për bizneset është rreth 1.3 pikë përqindje më i lartë. Në tremujorin e dytë është bërë evidente edhe rritja e interesit të kredisë hipotekare në euro për individët. Ajo rezultoi 5.0%, me një rritje prej 1.4 pikë përqindje krahasuar me nivelin mesatar të tremujorit të parë të këtij viti dhe të vitit të kaluar. Diferencat mes interesave të kredive në lekë dhe atyre të kredive në euro janë ngushtuar ndjeshëm, si rrjedhojë e rritjes së shpejtë të këtyre të fundit.
Në të kundërt, norma mesatare e interesit të depozitave me afat në lekë ka mbetur e qëndrueshme në tremujorin e dytë të vitit, në 1.5%. E tillë është shfaqur edhe norma mesatare e interesit për depozitat me afat në euro, prej 0.8%. Diferenca mes interesit në lekë dhe atij në euro për depozitat qëndron në nivelin 0.7 pikë përqindje prej tre tremujorësh, nga mesatarisht 0.5 pikë përqindje në vitet 2020-2021 dhe në gjysmën së parë të vitit 2022.
