Mungesa e reshjeve dhe rritja e kërkesën për energji gjatë ditëve të nxehta kanë detyruar Korporatën Elektroenergjetike t’i drejtohet tregut të lirë për blerjen e energjisë. Në harkun kohor të 2 javëve KESH ka zhvilluar 5 procedura, ndërkohë që sipas përllogaritjeve, fatura e shpenzimeve arrin në rreth 23.8 mln euro. Çmimi me të cilin është siguruar energjia varion nga 75 në 116 euro/mWh, një vlerë ndjeshëm më e ulët se viti i kaluar.
Këto janë blerjet e para për këtë vit, duke qenë se deri në muajin qershor situata e favorshme hidrike ndikoi në rritjen e prodhimin e energjisë elektrike, duke bërë të mundur jo vetëm plotësimin e nevojave konsumatore, por edhe shitjen e energjisë. Përmes procedurave të realizuar në periudhën janar – qershor KESH ka arritur të sigurojë të ardhura nga shitja e energjisë elektrike, ndonëse çmimi me të cilin shitej energjia mbetej më i ulët se në tregjet ndërkombëtare.
Nga ky aktivitet, për periudhën 6 – mujore KESH arkëtoi rreth 41.5 mln euro. Gjithsesi, pavarësisht rritjes së prodhimit, gjeneruesi publik nuk arriti të sigurojë kontrata depozitimi, ndonëse shpalli disa procedura. Paralelisht, edhe optimizimi i portofolit ka pasur të njëjtin fat, duke qenë se në tenderë të zhvilluar më herët, KESH arriti vetëm të shesë energjinë, por jo ta blejë të njëjtën sasi me çmim më të leverdisshëm.. TV Scan
