Shqiptarët sigurojnë makinat, më pak shëndetin dhe aksidentet

Shqiptarët sigurojnë makinat, por jo shëndetin e tyre. Madje, as shtimi i numrit të aksidenteve nuk i ka bërë më të vetëdijshëm. Autoriteti i Mbikëqyrjes Financiare konstaton se në tremujorin e parë të këtij viti, tregu i sigurimeve ka njohur rritje në pjesën dërrmuese të portofoleve, por sigurimi aksidenteve dhe shëndetit është ndër të paktat zëra me rënie të ndjeshme.

Sipas të dhënave zyrtare të AMF-së, të ardhurat nga sigurimet e Aksidenteve dhe Shëndetit, gjatë muajit janar-maj 2023, arritën në rreth 554 milionë lekë, afërisht 5 milionë euro, duke shënuar një ulje prej 7.9% në krahasim me muajin janar-maj 2022. Ndërkaq, Primet nga sigurimet e Jetës gjatë muajit janar-maj 2023, arritën rreth 710 milionë lekë, ose 21.88% më shumë se në të njëjtën periudhë të një viti më parë.

Që të dyja portofolet janë pjesë e sigurimit vullnetar, të cilat, për periudhën janar-maj 2023 arritën rreth 4,1 miliardë lekë, apo 40 milionë euro, 24.83% më shumë se në muajin janar-maj 2022. Numri i kontratave të sigurimit vullnetar u rrit me 2.88% krahasuar me muajin janar-maj 2022.

Primet e sigurimit vullnetar të Jo-Jetës gjatë muajit janar-maj 2023, patën një rritje me 25.62% kundrejt muajit janar-maj 2022.

Në portofolet e Pronës, Përgjegjësive, Garancive të cilat gjatë muajit janar-maj 2023 siguruan mbi 2,209 milionë lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 68.96%, të pasuara nga sigurimi i Përgjegjësisë së Përgjithshme me 22.97% të totalit.

Në portofolin sigurimi nga Zjarri dhe Forcat e Natyrës, gjatë muajit janar-maj 2023, vihet re një rritje prej 37.38% e vëllimit të primeve të shkruara bruto të këtij portofoli dhe një rritje me 5.13% e numrit të kontratave të sigurimit, krahasuar me muajin janar-maj 2022.