Shtimi i turistëve në vend është shoqëruar me rritje të numrit të aksidenteve, por me më pak të aksidentuar për fat të mirë. Sipas të dhënave të Institutit të Statistikave, në qershor të këtij viti u shënuan 101 aksidente rrugore nga 98 të ndodhura në të njëjtën periudhë të një viti më parë. Numri i aksidenteve rrugore është rritur me 3.1%.
Ndonëse ka pasur më shumë aksidente, për fat të mirë ato kanë qenë me më pak dëme në njerëz. Numri i të aksidentuarve (të vrarë dhe të plagosur) rezulton 132 persona nga 141 në qershorin e vitit të kaluar.
Të rinjtë vijojnë të jenë shkaktarët më të mëdhenj të aksidenteve. Sipas INSTAT, aksidentet rrugore, në 82.2% të rasteve, kanë ndodhur si pasojë e sjelljes së drejtuesit të mjetit.
Numri më i lartë i aksidenteve në këtë periudhë është kryer nga grup-mosha 25-34 vjeç, duke zënë 30.7% të numrit të aksidenteve gjithsej. Aksidentet në këtë grup-moshë janë rritur me 14.8%, krahasuar me të njëjtën periudhë të një viti më parë.
Në muajin Qershor 2023, numri më i lartë i aksidenteve rrugore ka ndodhur ditën e Premte me 18.8%, ndërsa numri më i ulët i aksidenteve ka ndodhur ditën e Mërkurë me 8.9%.
Në qershor, 20.8% e aksidenteve rrugore kanë ndodhur gjatë harkut kohor 08:00-12:00.
