Humbet leverdia, interesat e bonove 12-mujore në nivelin më të ulët të një viti

Nuk ka të ndalur rënia e interesave të bonove të thesarit. Sipas të dhënave të Bankës së Shqipërisë,

në ankandin e parë të muajit korrik, interesat e bonove me afat maturimi 12-mujor arritën në 3.09%, i njëjtë me ankandin e fundit të muajit qershor. Niveli aktual i yield-eve është më i ulët që prej fillimit të gushtit të vitit të kaluar.

Yield-et e bonove të thesarit kanë ndjekur një tendencë të vazhdueshme në rënie në gjysmën e parë të vitit 2023. Kjo tendencë i detyrohet rënies së inflacionit, frenimit të rritjes së normave të interesit nga Banka e Shqipërisë dhe likuiditetit të lartë në tregun financiar dhe sidomos atë bankar, që është edhe financuesi kryesor i borxhit të brendshëm të qeverisë.

Nga 5 miliardë lekë që ishte shuma e shpallur për financim nga Ministria e Financave dhe Ekonomisë, shuma totale e kërkesave të paraqitura në ankand arriti në më shumë se 8 miliardë lekë. Kjo tregon një interes të lartë nga agjentët ekonomikë për të investuar në letrat me vlerë të qeverisë, duke bërë këshut presion edhe në uljen e interesave.