LIGJET E BIZNESIT
Qytetarët e vlerësojnë korrupsionin një ndër shqetësimet kryesore për ta. Ky problem nuk është vetëm për Shqipërinë, por për të gjitha vendet e rajonit. Është ky një ndër përfundimet e studimit “Promovimi i bashkëpunimit ndërmjet aktorëve të shoqërisë civile në luftën kundër korrupsionit”, organizuar nga Qendra Shqiptare për Kërkime Ekonomike dhe financuar nga Bashkimi Europian.
Sipas këtij studimi, korrupsioni në nivel vendor është një shqetësim në rritje për organizatat e shoqërisë civile në vendet e Balkanit Perendimor. Gjithashtu, forcimi i mirëqeverisjes lokale shihet i lidhur ngushtë me rritjen e pjesëmarrjes qytetare në zgjedhje dhe në qeverisje, me rritjen e llogaridhjes së të zgjedhurve dhe të emëruarve në pushtetin lokal, me luftën pa kompromis kundër korrupsionit dhe si rezultat, me mirëqeverisjen e aseteve dhe të fondeve publike në dispozicion.
Mbi bazën e informacionit të grumbulluar nga studimi, përfaqesuesit e tre organizatave të shoqërisë civile evidentuan lidhjen e fortë midis zhvillimit social-ekonomik dhe mirëqeverisjes të provuar gjerësisht në vendet demokratike Perendimore, duke theksuar se mirëqeverisja është një premisë thelbësore për rritjen e qëndrueshme ekonomike, reduktimin e varfërisë dhe mbrojtjen e mjedisit.
Për arritjen e këtij qëllimi, një rol vendimtar luan besimi ndaj qeverisë në sigurimin e legjitimitetit dhe të qëndrueshmërisë së vetë sistemit politik të një vendi.
Në mënyrë specifike, qytetarët e intervistuar (450 në secilin vend) konfirmojnë se me diferenca te vogla nga njëri vend në tjetrin, më shumë se ¾ e tyre e shohin korrupsionin si problem serioz dhe shumë serioz. Për reduktimin e korrupsionit qytetarët shprehin nivel të lartë mosbesimi në ekzistencën e vullnetit politik, ku shkalla e mosbesimit për suksesin e kësaj lufte është më e lartë në Kosovë (36%), afërsisht dyfish në Serbi (66%) dhe 72% në Shqipëri.
Pasojat e korrupsionit shihen të lidhura drejtëpërdrejtë me rritjen e ngadalshme ekonomike, lirinë ekonomike të të bërit biznes dhe ndryshimin e ngadalshëm të nivelit të jetesës. Ndërkaq, gjatë dekadës së fundit, perceptimi lidhur me korrupsionin për grupin e përgjigjeve keq, shumë keq dhe njësoj zë perkatesisht 86.1% në Serbi; 55.1% në Kosovë dhe 94.4% në Shqipëri.
