LIGJET E BIZNESIT
Në “A2 Business” me gazetaren Aurora Sulçe u fol për bashkëpunimin ekonomik mes Shqipërisë dhe Kosovës, për barrierat dhe potencialin e munguar.
Nagip Skënderi, ekspert për ekonominë, deklaroi se duhet që të përshpejtohet zbatimi i marrëveshjeve të nënshkruara mes dy qeverive.
“Marrëveshjet e nënshkruara nga ana e dy qeverive nuk po zbatohen të gjitha. Duhet që të përshpejtohen, pasi kemi shumë resurse natyrore e njerëzore që të dyja shtetet mund t’i bashkërendisin. Në këtë kontekst, ka barriera që, me ose pa qëllim, të dyja qeveritë po i vendosin. Më shumë shkëmbime tregtare kemi me Serbinë sesa me Shqipërinë”, tha Skënderi.
Qemal Minxhozi, ambasador i Shqipërisë në Kosovë, mendon se shkëmbimet tregtare mes dy vendeve kanë rritje vit pas viti.
“Ka pasur nga viti në vit një rritje prej 30 milionë eurosh. Potenciali është diçka tjetër, ndërsa mundësitë zvogëlohen dhe nuk arrijnë atë inputin që duhet. Kjo ndodh sepse kemi dy ekonomi komplementare njëra me tjetrën. Për shembull, skrapin, Kosova e përpunon të gjithin në Shqipëri. Në fillim del në eksport, pastaj në import po me mallin e saj”, deklaroi ambasadori.
Ndërsa Skënder Krasniqi, kryetar i Dhomës së Tregtisë dhe Industrisë së Kosovës, mendon se problemi qëndron te politikat ekonomike që ndiqen në Kosovë.
“Ka përmirësime në krahasim me vitet e kaluara. Falë bashkëpunimit mes dhomave të tregtisë dhe institucioneve, është arritur që të eliminohen një pjesë e madhe e sfidave. Por, duhet rritur bashkëpunimi, pasi mundësitë janë të jashtëzakonshme për rritjen e shkëmbimit tregtar. Ka edhe disbalancë mes importit dhe eksportit, që Kosova e ka me të gjitha shtetet, por duhet ngushtuar kjo në lidhje me Shqipërinë”, tha Krasniqi.
“Barrierat nuk janë të mëdha, por mungon strategjia kombëtare. Kosova nuk ka strategji reale kombëtare të zhvillimit ekonomik, që të krijojë produkte për të konkurruar në tregje të tjera. Të gjitha prodhimet serbe që vijnë në Kosovë janë të subvencionuara dhe vijnë me kosto të ulët. Kosova nuk e subvencionon dhe nuk e fuqizon eksportin. Ka edhe mungesë bashkëpunimi me Tiranën, që ne të mos jemi konkurrentë me produkte të njëjta”, shpjegoi më tej, kreu i Dhomës së Tregtisë dhe Industrisë së Kosovës, Skënder Krasniqi.
