LIGJET E BIZNESIT
Qeveria vendos të shkrijë Bordin e Transparencës Karburanteve, të ngritur më 12 mars të vitit të kaluar për të frenuar abiuzimet me çmimet, pas nisjes së luftës në Ukrainë. Ministrja e Ekonomisë dhe Financave, Delina Ibrahimaj njoftoi pas mbledhjes së Këshillit të Ministrave vendimin.
“Çmimet kanë pasur luhatje të ndryshme dhe shumë të mëdha. Kanë qenë ndjeshëm mbi normën historike, prandaj vendosëm që të përcaktonim disa marzhe fitimi që nuk mund të ndryshonin, për të limituar spekulimet dhe abuzimet me çmimet. Gjatë gjithë vitit kemi bërë mbledhje sa herë ndryshonin çmimet në bursë dhe përcaktonim çmimet për konsumatorin. Sot, tregjet janë stabilizuar dhe sot vendosëm për shfuqizimin e Bordit të Hidrokarbureve”, shpjegoi ministrja.
Më herët, me kërkesë të opozitës ishte Gjykata Kushtetuese që shfuqizoi Bordin e Transparencës së çmimeve të mallrave të konsumit, gjithashtu të ngritur nga qeveria për të frenuar abuzimet e importuesve dhe tregtarëve.
