Rekordi i ri i euros, zbret afër 108 lekëve

Nuk ka të ndalur rënia e euros. Monedha europiane ka zbritur afër kufirit të 108 lekëve, niveli më i ulët i shënuar ndonjëherë. “Rrokullisja” e euros ka muaj që ka nisur dhe u bë e ndjeshme veçanërisht përpara zgjedhjeve të 14 majit. Por tani, duket se po shënon minumime të reja historike çdo ditë.

Sipas kursit zyrtar të këmbimit të Bankës së Shqipërisë, monedha europiane u këmbye sot me 108.18 lekë. Euro është zhvlerësuar me 5.3% që nga fillimi i këtij viti dhe me 10% krahasuar me të njëjtën periudhë të vitit të kaluar.

Dobësimi i euros po ndodh për shkak të sasisë së madhe të kësaj valute në qarkullim. Oferta po shtohet edhe më shumë nga prurjet valutore të turistëve. Ekspertët parashikojnë që euro të prekë nivele edhe më të ulëta me kulmimin e sezonit veror, për shkak të turistëve dhe emigrantëve që do të kthehen në atdhe për pushime.