Rekord për investimet e huaja në tremujorin e parë, kompanitë riinvestojnë fitimet

Investimet e huaja shënojnë rekordin e ri historik. Sipas të dhënave të Bankës së Shqipërisë, në tremujorin e parë të këtij viti fluksi i investimeve të huaja arriti në 308 milionë euro, me rritje 1.65% krahasuar me të njëjtën periudhë të një viti më parë. Kjo është vlera më e lartë e investimeve të huaja direkte e regjistruar ndonjëherë në këtë periudhë të vitit.

Peshën kryesore në këtë fluks e kanë dhënë fitimet e riinvestuara nga kompanitë. Ato shënuan vlerën e 183 milionë eurove, në rritje me 9.6% krahasuar me të njëjtën periudhë të një viti më parë.

Ato kanë kompensuar një pjesë të rënies së flukseve të reja investuese nga jashtë dhe pesha e tyre e lartë është karakteristike në degë, ku kërkohen investime të konsiderueshme periodike, si në industrinë nxjerrëse, por edhe në disa sektorë të shërbimeve.

Megjithatë, edhe investimet në formën e flukseve të reja të kapitalit shënuan një rritje edhe më të lartë në tremujorin e parë të këtij viti. Ato arritën vlerën e 143 milionë eurove, në rritje me 28.8% krahasuar me tremujorin e parë të vitit të kaluar.

Pas pandemisë, investimet e huaja direkte kanë shënuar një ringritje të shpejtë. Vitin e kaluar, ato arritën vlerën e 1.37 miliardë eurove, në rritje me 33% krahasuar me një vit më parë. Në këtë ecuri kanë pasur një rol të rëndësishëm investimet e të huajve në pasuri të patundshme në Shqipëri.