Propozimi i bankave: Mundësi eksportuesve të mos paguajnë kreditë deri në fund të vitit

Bankat do t’u japin mundësi bizneseve eksportuese që deri në fund të vitit të mos paguajnë kreditë ose të rishikojnë kontratat e huadhënies që kanë. Kjo si një masë për t’i ndihmuar nga zhvlerësimi I euros. Lajmi u bë i ditur nga Sekretari i Përgjithshëm i Shoqatës së Bankave, Spiro Brumbulli në emisionin A2 Business të gazetares Aurora Sulçe. Vendimi lidhur me këtë propozim pritet të jepet nga Banka e Shqipërisë brenda javës së ardhshme.

“Ka një vëmendje të shtuar për ato shoqëri që eksportojnë dhe mund të preken nga forcimi i lekut dhe jemi duke diskutuar për ato shoqëri që eksportojnë dhe mund të preken nga forcimi i lekut, që kanë të ardhura në ero dhe shpenzimet në lekë. Jemi duke diskutuar që mund të ketë një periudhë strukturimi pa penalizime deri në fund të vitit vetëm për këtë industri.

Ne e kemi kërkuar zyrtarisht në kuadër të masave që mori qeveria. Dhe i kemi kërkuar BB për t’i ardhur në ndihmë këtij sektori që mund të jetë masë e përkohshme deri në fund të vitit që mund të bëhen ristrukturime të kredive të kësaj industrie për të mos u penalizuar. Ne e kërkojmë në përgjigje të shqetësimit të tyre dhe si një rrugë bashkëpunimi. Këtë që kemi në dorë ne si banka për të bërë”, ka deklaruar Brumbulli në A2 Business.